«بارىس» ءوز ايدىنىندا «نەفتەحيميكتەن» جەڭىلدى

استانا. 25 قاڭتار. بۇگىن قۇرلىقتىق حوككەي ليگاسى شەڭبەرىندە «بارىس» ءوز ايدىنىندا نيجنەكامسكىنىڭ «نەفتەحيميگىن» قابىلداپ, 1:2 ەسەبىمەن ەسە جىبەردى. بۇل تۋرالى egemen.kz ءتىلشىسى حابارلادى. ءبىرىنشى كەزەڭدە ەسەپ اشىلعان جوق. 9-مينۋتتا قوناقتار ساپىنان ەكى بىردەي ويىنشى ايدىننان قۋىلىپ, «بارىس» 5ح3 فورماتىندا ويناۋعا مۇمكىندىك الدى. الايدا, اندرەي نازاروۆتىڭ شاكىرتتەرى بۇل مۇمكىندىكتى ءتيىمدى پايدالانا المادى. ەسەسىنە, ەكىنشى كەزەڭنىڭ سوڭىندا «نەفتەحيميك» ويىنشى باسىمدىعىن جۇزەگە اسىرىپ, العا شىقتى. اتاپ ايتقاندا, 40-مينۋتتا نيكيتا ششيتوۆ مەرگەندىگىمەن كوزگە ءتۇستى. بۇل كەزدە «بارىستىڭ» ۇزدىك حوككەيشىلەرىنىڭ ءبىرى نايدجەل دوۋس جازالانعان بولاتىن. تاعى ءبىر ەسكەرە كەتەر جايت, ەكىنشى بولىكتە ءبىزدىڭ كوماندا ەكى رەت ويىنشى باسىمدىعىنا يە بولىپ, ەكەۋىن دە ءمۇلت جىبەردى. ماتچتىڭ سوڭىندا, ياعني 54-مينۋتتا استانالىقتار كەۆين داللمەننىڭ كومەگىمەن تارازى باسىن تەڭەستىرگەنىمەن, ارادا 4 مينۋت وتكەندە, ءوز قاقپالارىنا ەكىنشى شايبانى جىبەرىپ الدى. ءدال وسى گول ويىن تاعدىرىن شەشتى. جەڭىس گولىنىڭ اۆتورى – يگور پولىگالوۆ. وسىمەن «بارىس» قاتارىنان ەكىنشى رەت جەڭىلىپ وتىر. قورجىنىندا 78 ۇپايى بار ەلوردالىقتار ازىرگە شىعىس كونفەرەنتسياسىندا 7-ورىندا كەلەدى. ال 9-ورىندا تۇرعان, «بارىستىڭ» پلەي-وفف جولداماسىنا تالاستا نەگىزگى قارسىلاسى – «نەفتەحيميك» بۇگىنگى جەڭىسىنەن كەيىن ۇپاي سانىن 75-كە جەتكىزىپ, جاعدايىن ايتارلىقتاي جاقسارتىپ الدى. «بارىس» كەلەسى كەزدەسۋىن 27 قاڭتاردا ءوز ايدىنىندا چەليابىنىڭ «تراكتورىمەن» وتكىزەدى. ەلامان قوڭىر. دەرەك: egemen.kz. سۋرەت: hcbarys.kz.