پۋتين ەۋروپا ەلدەرى ەۆرەيلەرىن رەسەيگە كەلۋگە شاقىردى

استانا. 20 قاڭتار. رەسەي پرەزيدەنتى ۆلاديمير پۋتين سوڭعى كەزدەرى ەۋروپا ەلدەرىندە ءوسىپ بارا جاتقان انتيسەميتيزم كورىنىستەرى مەن مۇسىلمان-ميگرانتتار تاراپىنان زورلىق-زومبىلىقتى كوبىرەك تارتىپ جۇرگەن ەۆرەيلەردى رەسەيگە كەلىپ تۇرۋعا شاقىردى. بۇل تۋرالى «ينتەرفاكس» اقپارىنا سۇيەنگەن egemen.kz ءتىلشىسى حابارلادى. مەملەكەت باسشىسىنىڭ ەۋروپا ەۆرەيلەر كونگرەسىنىڭ وكىلدەرىمەن كەزدەسۋى بارىسىندا وسى ۇيىمنىڭ پرەزيدەنتى ۆياچەسلاۆ كانتور قازىر ەۋروپاداعى ەۆرەيلەردىڭ جاعدايى ەكىنشى دۇنيەجۇزىلىك سوعىستىڭ كەزىندەگىدەن دە ناشار ەكەنىن مالىمدەدى. ونىڭ ايتۋىنشا, ۇستەمدىك پەن وكتەمدىكتىڭ وسۋىنەن بۇل ءناسىلدىڭ وكىلدەرى جان-جاققا قاشىپ جاتىر. «وندا بىزگە كەلسىن. كسرو كەزىندە كەتىپ قالدى عوي, ەندى قايتا ورالسىن. مەن ولاردىڭ قوعامدىق ورىنداردا كيپا كيىپ جۇرۋدەن دە قورقاتىندارىن, ءتىپتى وزدەرىنىڭ ۇلتتارىن جاسىراتىندارىن رەپورتاجداردان كوردىم», - دەدى پۋتين. دەگەنمەن, ول ەۋروپاداعى احۋالدىڭ تاپ وسىنشاما دەڭگەيدە ناشار ەكەنىنە كۇمانى بار ەكەنىن دە ءبىلدىردى. سوزىندە ەۆرەيلەردىڭ ءناتسيزمدى اشكەرەلەۋ باعىتىندا اتقارىپ جۇرگەن جۇمىستارىنا العىس ايتتى. پرەزيدەنت ۇسىنىسىنا كانتور مۇنىڭ «جاڭا ءپرنيتسيپتى فۋندامەنتتى يدەيا» ەكەنىن ايتىپ جاۋاپ قايتاردى. كونگرەسس باسشىسى مۇنى ۇيىم مۇشەلەرىمەن بىرگە تالقىلايتىندارىن جەتكىزدى. ەۋروپا ەۆرەيلەرىنىڭ كونگرەسى – قۇرلىقتىڭ 42 ەلىندە تۇراتىن ەۆرەيلەر مۇددەسىن قورعايتىن ۇكىمەتتىك ەمەس ۇيىم. ول 1986 جىلى قۇرىلعان. مۇرات ايتقوجا. دەرەك, فوتو: ينتەرفاكس.