الماتىلىقتار ءماۋلىتتى اتاپ ءوتتى

الماتىداعى رەسپۋبليكا سارايىندا قازاقستان مۇسىلماندارى ءدىني باسقارماسىنىڭ ۇيىمداستىرۋىمەن مۇحاممەد پايعامبارىمىزدىڭ (س.ع.س.) تۋعان كۇنى – ءماۋلىت مەرەكەسىنە بايلانىستى رۋحاني كەش بولىپ ءوتتى. مەرەكەلىك شاراعا قازاق­ستان مۇسىلماندارى ءدىني باس­قارماسىنىڭ توراعاسى, باس ءمۇفتي ەرجان قاجى مالعاجى ۇلى, نايب ءمۇفتي سەرىكباي قاجى وراز, سونداي-اق زيالى قاۋىم وكىلدەرى مەن ءدىن قىزمەتكەرلەرى قاتىستى. ەرجان قاجى مالعاجى ۇلى يگى شاراعا جينالعان حالىقتى ءماۋلىت مەرەكەسىمەن قۇتتىقتاي كەلە, مۇسىلمان الەمىندە ءماۋلىتتى اتاپ ءوتۋدىڭ ماڭىزدىلىعى مەن پايعامبارىمىزدىڭ ءومىرى تۋرالى ماعىنالى ءسوز سويلەدى. – الەمدى قاراڭعىلىقتان الىپ شىعىپ جارىق نۇرعا بولەگەن, ەكى دۇنيەنىڭ باقىتىنا كەنەلۋگە ۇستاز بولعان مۇحاممەد (س.ع.س.) پايعامبارعا ارنالعان ءماۋلىت كەشىندە وتىرمىز. بۇگىنگى ءماۋلىت – كەشىرىم مەن مەيى­رىمدىلىكتىڭ مەرەكەسى. بۇل ءىز­گىلىكتى پايعامبارىمىز كورسەت­كەندەي, ادامداردىڭ ءبىر-ءبىرىن قۇرمەتتەۋىنىڭ, قامقورلىق جاساۋدىڭ مەرەكەسى, – دەدى باس ءمۇفتي. رۋحاني كەشتە «ونەر قىران­دارى» تەاترى ونەرپاز­دارىنىڭ عيبراتتى وقيعاعا تولى قويىلىمى كورەرمەن كوڭىلىنە وي سالىپ, ەرەكشە اسەرگە بولەدى. «جىگىتتەر» كۆارتەتى, بەكجان تۇرىس, توقتار سەرىك, ەركىن نۇرجانوۆ, تاعى باسقا ونەرپازداردىڭ ورىنداعان تەرمە-تولعاۋ, عيبراتتى ءان-جىرلارى مەرەكەنىڭ ءارىن كىر­گىزىپ, جينالعاندارعا قۋانىش سىيلادى. ودان بولەك, بەلگى­لى ايتىس­كەر اقىندار مەن ونەر­پازدار ءوز ونەرلەرىن كورسەتىپ, رۋحاني كەشتىڭ شىرايىن كەلتىردى. پايعامبارىمىز مۇحا­ممەد­كە (س.ع.س.) سالاۋاتتار وقى­لىپ, ءسا­لەمدەر ايتىلدى. ءماۋ­لىتتى تاما­شالاۋعا كەلگەن جا­ماعات­تىڭ بارلىعىنا قازاق­ستان مۇ­سىل­ماندارى ءدىني باسقار­ماسىنىڭ سوڭ­عى شىعارعان كىتاپ­تارى, ايات-حاديستەر جازىلعان ءۇنتاس­پالار سىيعا تارتىلدى. سونىمەن بىرگە, تۇرمىستىڭ اۋىرتپاشىلىعىن تارتىپ, ەلىمىزدىڭ تەلەارنالارى ارقىلى كومەك سۇراعان وتباسىلارعا, بالالار ۇيلەرىنە ماۋلىتتەن تۇسكەن قارجى قايىرىمدىلىق ەسەبىندە ءبولىندى. ءبىرىنشى كەزەكتە اۋىر دەرتكە شالدىققان بالالاردىڭ سىرقاتىن ەمدەۋگە جۇمسالسا, ەكىنشىدەن, كوپ بالالى انالار مەن قامقورسىز قالعان قارتتارعا كومەك كورسەتىلدى. شارانىڭ باستى ماقساتى جاستاردىڭ ءدىني كوزقاراسىن ءداستۇرلى ءدىنىمىزدىڭ تالاپتارىمەن, ادەت-عۇرپىمىزدىڭ قۇندىلىقتارىمەن, ۇلتتىق بولمىسىمىزبەن ۇشتاستىرىپ, يماندى, زيالى, زايىرلى قوعام قۇرۋعا ۇلەس قوسۋ بولدى . قانات ەسكەندىر, «ەگەمەن قازاقستان». الماتى.