نەگىزگى ماقساتتى تاعى ءبىر ناقتىلادى

ەلباسىمىز ن.ءا.نازارباەۆ ەلىمىزدىڭ ەڭ باستى جەتىستىگى – ءتا­ۋەلسىزدىگىمىزدىڭ 25 جىلدىعى مەرەكەلەنەتىن جىلدىڭ باسىندا الەمدە بولىپ جاتقان قيىندىقتارعا قاراماستان, ۇلكەن ماقساتتاردى العا قويا وتىرىپ, وعان جەتۋگە ىنتالاندىراتىن ناقتى قادامداردىڭ ماڭىزدىلىعىن «ۇلت جوسپارى – قازاقستاندىق ارمانعا باستايتىن جول» اتتى ماقالاسىندا تاعى دا اتاپ كورسەتتى. «قازاقستان-2050» ستراتەگيا­سىندا كورسەتىلگەن قازاقستاننىڭ الەمدەگى دامىعان 30 ەلدىڭ قا­تا­رىنا قوسىلۋ ماقساتىنىڭ ورىندالۋى «100 ناقتى قادام» ۇلت جوسپارىنان باستاۋ الادى. پرەزيدەنتىمىزدىڭ اتالعان ماقالاسىندا جالپى «ۇلت جوس­پارى – 100 ناقتى قادام­دا» بەس ينستيتۋتتىق رەفورما ايا­سىن­داعى ماقساتتار مەن مىندەتتەردىڭ نەگىزگى باعىتتارى ايقىندالعان. سونىمەن قاتار, وندا كورىنىس تاپقان ماسەلەلەر ۇلت جوسپارىنىڭ ءار قادامى بويىنشا ەلباسىنىڭ ءتۇيىنى جانە الداعى ۋاقىتتا ۇكىمەت پەن بيلىك ورگاندارىنا قويعان باستى تالاپتار جيىنتىعى دەۋگە بولادى. وتكەن 2015 جىل – بەس ينس­تيتۋتتىق رەفورمانىڭ جاريا­لا­نۋى مەن ونى جۇزەگە اسىرۋ ءۇشىن زاڭنامالىق جانە ۇيىم­داستىرۋشىلىق قامتاماسىز ەتى­لۋىمەن ەرەكشەلەندى. بۇل اۋ­قىم­دى جۇمىسقا پارلامەنتتەگى دەپۋتاتتىق كورپۋس تا, مەملەكەتتىك ورگاندار دا بەلسەندى تۇردە اتسالىستى. سونىڭ ناتيجەسىندە مەملەكەت باسشىسى پارلامەنتتىڭ زاڭ شىعارۋشىلىق ىسىنە جوعارى باعا بەردى. دەپۋتاتتار ءۇشىن بۇل ۇلكەن مارتەبە. ەندى وسى رە­­فور­مالاردى ناقتى جۇزەگە اسىرۋ باستالادى. سوندىقتان دا ارقايسىمىز قازاقستاندىق ارمانىمىزدىڭ ورىندالۋىنا بار كۇش-جىگەرىمىزدى جۇمىلدىرۋ ارقىلى ۇلەس قو­سۋىمىز قاجەت. ال قازاقستاندىق ارمانعا جەتۋ دەگەندى مەن ەلىمىزدىڭ ءار ازا­­ماتىنىڭ اسقاق ارماندارىنا جەتۋ جولى دەپ تۇسىنەمىن. سەبەبى, ەلباسىمىز ءوز ماقالاسىندا ازا­ماتتارىمىزدىڭ وسى ماقساتقا جەتۋ جولىندا بۇگىنگى كۇنى ۇسى­نىلىپ وتىرعان زاڭنامالاردى, ياعني ءوز قۇقىعى مەن مىندەتتەرىن جانە مۇمكىندىكتەرىن بىلۋىنە, ونى جەتە پايدالانۋىنا ەرەكشە ءمان بەرەدى. ۇلت جوسپارى شەڭ­­بەرىندە جۇزەگە اسىرىلاتىن مەملەكەتتىك باسقارۋ مەن قۇقىقتىق ءتارتىپ جۇيەسىندەگى رەفورمالار حالقىمىزدىڭ ەكونوميكالىق جانە ازاماتتىق بەلسەندىلىگىن ارتتىرىپ, ەلىمىزدىڭ ءارى قاراي دامۋىنا ىقپال ەتەتىن بولادى. ماقالادا ەلباسى قازاقستان حالقى اسسامبلەياسىنىڭ 20 جىل ىشىندە اتقارعان جۇمىسىنا دا باعا بەرىپ, كوپەتنوستى ەل بولۋ – ءبىزدىڭ وزگە ەلدەردەن باستى ەرەكشەلىگىمىز جانە اسا ۇلكەن بايلىعىمىز ەكە­­نىن اتاپ ءوتتى. راسىندا دا, قازاقستاننىڭ بۇگىنگى جەتىستىكتەرى, حالىقارالىق ارەناداعى بەدەلى ەتنوسارالىق ىنتىماق پەن بىرلىككە تىكەلەي بايلانىستى. الەمدە بولىپ جاتقان ءتۇرلى جاعدايلارعا قاراپ, ەل ىشىندە تۇراقتىلىق, بەيبىتشىلىك پەن كەلىسىمدى بارىنشا نىعايتۋدىڭ ماڭىزدىلىعىن تاعى دا اتاپ كورسەتۋ ەشقاشان ارتىق بولمايدى. بارلىق سالالاردى جان-جاقتى دامىتۋعا باعىتتالعان ۇلت جوسپارىن ورىنداۋ, رەفورمالاردى تابىستى جۇزەگە اسىرۋ, ەكو­نوميكانى جاڭعىرتۋ – ۇلت بىرلىگىن ءارى قاراي نىعايتۋدىڭ باس­تى جولى بولماق. وسىناۋ ۇلى ىستەردى جۇزەگە اسىرۋعا اسسامبلەيا دا وزىندىك ۇلەس قوسادى. زۋحرا ساياپوۆا, پارلامەنت ءماجىلىسىنىڭ دە­پۋتاتى, قازاقستان حالقى اسسامبلەياسى كەڭەسىنىڭ مۇشەسى.