مەكتەپتىڭ مەرەيى باسشىعا بايلانىستى

قازاق سپورتىنىڭ داڭقىن اسىرۋعا سۇبەلى ۇلەس قوسقان سپورت مەكتەپتەرىنىڭ ءبىرى – قاراعاندى وبلىستىق سپورتقا بەيىمدى, دارىندى بالالارعا ارنالعان مامانداندىرىلعان مەكتەپ-ينتەرناتى. ءبارىن جىپكە ءتىزىپ ايتپاساق تا, گرەك-ريم كۇرەسىنەن الەم چەمپيونى يگور روستوروتسكي, ەركىن كۇرەس بالۋاندارى – جاستار اراسىنداعى الەم چەمپيونى امانگەلدى جاپپاروۆ, جاسوسپىرىمدەر اراسىنداعى الەم چەمپيونى سەرىك الشىنباەۆ, بىلعارى قولعاپ شەبەرلەرى – الەم كۋبوگىنىڭ يەگەرى اركادي توپاەۆ, وليمپيادا چەمپيونى سەرىك ساپيەۆتىڭ اتالعان مەكتەپتەن تۇلەپ ۇشققانىنىڭ ءوزى وسى سوزىمىزگە دالەل بولا الادى. وكىنىشكە قاراي, سوڭعى جىلدارى چەمپيونداردىڭ ۇستاحاناسىنا اينالعان بۇل مەكتەپتىڭ باعى جانباي-اق قويدى. باسشىسى تۇراقتاماي ءجيى اۋىستى, تاربيە جۇمىسى بوساڭسىپ, شارۋاسىنان دا بەرەكە كەتە باستاعان-دى. مۇنى سپورتتىڭ ماڭىندا جۇرگەن جاناشىر ازاماتتار, مەكتەپتىڭ بۇرىنعى تۇلەكتەرى دە ءجيى ايتىپ جۇرگەن بولاتىن. جاعدايدىڭ وسىلايشا قالىپتاسقانى ەڭ الدىمەن سپورتتاعى جەتىستىكتەرگە كەرى اسەرىن تيگىزگەنى دە راس ەدى. تاياۋدا وسى مەكتەپ-ينتەرناتتىڭ ديرەكتورى تاعى دا اۋىستى. بۇل جولعى كەلگەن باسشىنى – ارقا سپورتىندا وزىندىك قولتاڭباسى بار ەردەن ءحاليليندى ءبىلىم ورداسىنىڭ ۇجىمى ءوز الدىنا, جالپى قاراعاندى سپورتىنىڭ قاۋىمى جىلى قابىلدادى. نەگە دەسەڭىز, ەردەن بالتاباي ۇلى – ءوڭىر سپورتىنىڭ ءوسىپ-وركەندەۋىنە ءبىر كىسىدەي اتسالىسىپ كەلە جاتقان ازامات. كەزىندە وسى مەكتەپتە جاتتىقتىرۋشى بولىپ ەڭبەك جولىن باستاعان, 2008-2011 جىلدارى وبلىستىق سپورت سالاسىن باسقاردى. ودان كەيىن «شاحتەر» فۋتبول كلۋبىنىڭ اتقارۋشى ديرەكتورى رەتىندە ورگە سۇيرەپ, ەل چەمپيوناتىنىڭ شىڭىنا ەكى مارتە شىعارعان. ۇيىمداستىرۋشىلىق قابى­لەتى زور باسشى رەتىندە قولعا العان شارۋانى ۇرشىقشا ءيىرىپ اكەتەتىن ىسكەرلىگىمەن كوزگە ءتۇستى. ەندى ەردەن حاليليندەي بىلىكتى باسشىعا ارتىلار سەنىم زور. سپورتىمىزدى ۇشپاققا شىعارار دەگەن دارىندار وقىپ, تاربيە الىپ جاتقان ءبىلىم مەكەمەسىنىڭ بەدەلىن كوتەرىپ, مەرەيىن ءوسىرۋ – ەڭ ءبىرىنشى كەزەكتە تۇرعان مىندەت. قايرات ءابىلدينوۆ, «ەگەمەن قازاقستان». قاراعاندى.