باي مەن كەدەيدىڭ اراسى الشاقتاپ بارادى

قازىرگى تاڭدا جەر بەتىندەگى حالىقتاردىڭ جارتىسىنان استامى, ياعني 3,6 ملرد. بولىگى كەدەيشىلىكتە ءومىر سۇرەدى. ونسىز دا ىشەرگە – اس, كيەرگە كيىم تاپپاي, قينالىپ جۇرگەن قامكوڭىل جانداردىڭ جاعدايى سوڭعى بەس جىلدا تاعى 1 ترلن. دوللارعا تومەندەپ كەتكەن. ال جاھاننىڭ جارتى بايلىعىن يەمدەنىپ وتىرعان ساناۋلى ميللياردەرلەردىڭ قازىناسى وسى ۋاقىتتىڭ ىشىندە تەك كوبەيىپ وتىرعان ەكەن. كەدەيشىلىكپەن كۇرەستە بەل­سەندىلىك تانىتىپ جۇرگەن Oxfam كوممەرتسيالىق ەمەس ۇيىمىنىڭ مالىمدەۋىنشە, 2010 جىلدان بەرى قوس تاپتىڭ اراسى ەداۋىر الشاقتاعان. اتاپ ايتقاندا, بۇگىندە جارتى الەم­نىڭ قولىنداعى قارجىعا تەڭ بايلىققا يەلىك ەتىپ وتىر­عان جەر بەتىندەگى ەڭ باي 68 ادام بەس جىلدىڭ ىشىندە 1,76 ترلن. دوللارعا بايىعان. وسى رەتتە, 2010 جىلى كەدەي-كە­پ­شىكتىڭ, ياعني الەم حالقىنىڭ جارتىسىنىڭ بايلىعى ەڭ باي 388 ادامنىڭ ەسەپشوتىنداعى قارجىمەن تەڭ بولعانىن اتاپ وتكەن ءجون. ۇيىمنىڭ مالىمدەمەسىنە قارا­عاندا, بۇل ماسەلەگە سا­لىق­تاعى جەڭىلدىكتەر, ەڭبەكاقى­سىنداعى ايىرماشىلىقتار, جۇمىس­شىلارعا بەرىلەتىن سىياقىلاردىڭ قىسقارتىلۋى سىندى تەتىكتەر سەبەپ بولعان. سونداي-اق, بۇعان بۇگىنگى جا­ھاندىق ەكونوميكالىق داعدا­رىستىڭ دا سالقىنى تيگەنى ءسوزسىز. ويتكەنى, قازىرگى قارجى­لاي قىسپاققا كەدەي تۇرماق, بايلاردىڭ ءوزى شىداس بەرە الماي وتىر. ماسەلەن, 2016 جىلدىڭ العاشقى ەكى اپتاسىندا-اق الەمنىڭ ەڭ قالتالى 400 ادامى داعدارىس سالدارىنان 305 ملرد. دوللارىنان ايىرىلىپ, جيعان-تەرگەنىن جەلگە ۇشىرعان. ەلامان قوڭىر, «ەگەمەن قازاقستان».