OSB زاۋىتى

ەلىمىزدە بالاماسى جوق كاسىپورىن وسكەمەندە OSB ءوندىرىسى بويىنشا جاڭا زاۋىت اشىلماق. جاقىندا جاڭا كاسىپورىننىڭ تسەحىندا بولىپ, ءوندىرىس بارىسىمەن تانىسىپ قايتقان ەدىك. قالانىڭ سىرتىنداعى اينالما جولدىڭ بويىندا ورنالاسقان زاۋىتتىڭ ىشىندە ەڭبەك قايناپ جاتىر ەكەن. جالپى اۋدانى 2,5 مىڭ شارشى مەتردى قۇرايتىن ءزاۋلىم زاۋىتتا زاماناۋي قوندىرعىلار ورناتىلىپ, سىناقتان وتكىزىلىپ جاتقانىنىڭ ۇستىنەن تۇستىك. زاۋىت جەتەكشىلەرى ءۇيىرىلىپ تۇرعان الدەبىر ستانوكتىڭ تابانىنان وتكەن اعاشتىڭ ۇگىندىلەرى دايىن ءونىم بولىپ شىعۋى قاجەتتىگىن ءتۇسىندىردى. بۇل ءۇشىن ونىڭ جەلىمى مەن باسقا دا قوسپالارى جانە كومپيۋتەرلىك تەحنولوگيا ءوز دارەجەسىندە مۇلتىكسىز قىزمەت اتقارۋى ءتيىس. شەتەلدىك بىلىكتى ماماندار مەن كاسىپورىن قىزمەتكەرلەرى قوندىرعى جانىندا وسىلايشا ءونىم ءوندىرۋ بارىسىن تەكسەرىپ تۇرادى ەكەن. جاڭا كاسىپورىننىڭ قوندىرعىلارى قىتايدان ساتىپ الىنىپتى. 2014 جىلدىڭ ناۋرىز ايىنان باستاپ جۇزەگە اسىرىلىپ جاتقان «OSB ءوندىرىسى زاۋىتى» جوباسى ءوڭىردىڭ يندۋستريالاندىرۋ كارتاسىنا كىرگەن. جوبانىڭ جالپى قۇنى – 690 ميلليون تەڭگە. ونىڭ ىشىندە 400 ميلليون تەڭگە قاراجات «بيزنەستىڭ جول كارتاسى-2020» باعدارلاماسى بويىنشا الىنسا, قالعانى – جەكە قارجى. زاۋىت تولىق قۋاتىنا كوشكەن كەزدە مۇندا 140 ادام جۇمىس ورنىمەن قامتىلاتىن بولادى. قازىردىڭ وزىندە 70-كە جۋىق ادام ەڭبەك ەتەدى. – بىزگە مەملەكەت تاراپىنان ايتارلىقتاي قولداۋ كورسەتىلىپ وتىر. «دامۋ» قورى ارقىلى قول جەتكىزگەن نەسيەمىزدىڭ پايىزدىق ۇستەمەسى 14 پايىز بولسا, ونىڭ 10 پايىزىن مەملەكەت وتەيدى, – دەيدى زاۋىت باسشىسى الەكساندر ۆوروبەۆ. الەكساندر يۆانوۆيچ ءبىزدى OSB زاۋىتىنىڭ جۇمىس جۇيەسىمەن تانىستىردى. مۇندا جىلىنا 60 مىڭ تەكشە مەتر اعاش وڭدەلەدى. زاۋىت ديرەكتورىنىڭ ايتۋىنشا, الدىمەن شيكىزات كۇيىندە كەلگەن اعاشتار ارنايى زالدا قابىعىنان ارشىلىپ, تازالانادى. ودان كەيىن سۇرگىلەۋ ستانوگىنا تۇسەدى. اعاشتان تۇگەلدەي تەگىستەلگەن, ۇزىندىعى 0,14 سانتيمەتر­گە دەيىن, قالىڭدىعى 0,6 سانتيمەتردەن ارتىق ەمەس جاڭقا الىنادى. وسىدان كەيىن جاڭقا شيكىزاتى كەپتىرۋ بارابانىنا تۇسەدى. 200 گرادۋس تەمپەراتۋرادا كەپتىرۋ ۇدەرىسىنەن وتكەن جاڭقا ىرىكتەۋ ماشيناسىنا جەتكىزىلەدى. وندا ىرىلەرى مەن ۇساقتارى سۇرىپتالادى. بۇدان كەيىن جيناقتاۋشى بۋنكەرگە تاسىمالدانادى. ءارى قاراي جەلىمگە ارالاستىرىلىپ, وSB كىلەمى رەتىندە قوندىرعىدان تىعىز كۇيىندە باسىلىپ شىعادى. ودان سوڭ 200 گرادۋستىق تەمپەراتۋرادا 160 توننالىق قىسىممەن نىعىزداۋدان وتەدى. وسىدان كەيىن عانا OSB تاقتايلارى رەتىندە كەسىلىپ, دايىن ءونىم رەتىندە قويماعا جينالادى. OSB – قۇرىلىس سالاسىندا قات ماتەريالدىڭ ءبىرى. ال وتاندىق ءونىمنىڭ بولۋى سىرتتان كەلەتىن تاۋارعا باسەكەلەس بولىپ, ونىڭ قۇنىن تومەندەتۋگە سەپتىگىن تيگىزەدى. قازىرگى قارجىلىق قيىندىققا قاراماستان الىپ زاۋىتتى ىسكە قوسۋعا بار كۇش-جىگەرىن سالىپ جاتقان كاسىپورىن جەتەكشىلەرىنىڭ ءبىرى ۆيكتور الەكساندروۆيچتىڭ ايتۋىنشا, زاۋىت تولىق قۋاتىنا كوشكەن كەزدە جىلىنا 300 مىڭ تەكشە مەتر وSB ءونىمى وندىرىلەدى. بۇل شامامەن كۇنىنە ءبىر ۆاگون كولەمىندەي قۇرىلىس ماتەريالىنا تەڭ. اتالعان جوبانى جۇزەگە اسىرىپ جاتقان «مەليسسا» جشس 1989 جىلدان بەرى جۇمىس ىستەپ كەلەدى. فيرمانىڭ نەگىزگى قىزمەتى اعاشتان ءتۇيىن تۇيۋىمەن ەرەكشەلەنەدى. كاسىپورىن وسىعان دەيىن دە اعاش وڭدەۋمەن, دايىنداۋمەن, اعاش شەبەرلىگىمەن جانە كادەسىي بۇيىمدارىن جاساۋمەن شۇعىلدانىپ كەلگەن بولاتىن. سونداي-اق, اعاشتان قيىلعان ادەمى عيماراتتار سالادى. قىسقا قايىرعاندا, بۇگىندە اعاشتان جاسالعان 70-تەن استام ءتۇرلى تاۋار مەن 40-تان اسا كوركەم كادەسىي تۇرلەرىن وندىرەدى. ساياجايعا, دەمالىس ورنىنا ارنالعان كوتتەدجدەر نەمەسە قالا سىرتىنداعى تۇرعىن ءۇي, مونشا جانە شاتىرلاردى جەكەلەگەن تاپسىرىستار بويىنشا ازىرلەيدى. ءىس جۇزىندە جۇمىس ىستەپ تۇرعان ماتەريالدىق-تەحنيكالىق بازاسى بار كاسىپورىننىڭ جانىنان قۇرىلىپ جاتقان جاڭا جوبانىڭ ەلىمىزدە بالاماسى جوق ەكەندىگىن ءدال وسى ىسپەتتى زاۋىتتىڭ رەسەيدىڭ سانكت-پەتەربۋرگ پەن كۋرگان قالالارىندا عانا بار ەكەنىنەن بىلۋگە بولادى. – بۇل زاۋىتتىڭ ەلىمىزدە بالاماسى جوق. قىتايدا شىعارىلاتىن قوندىرعىلاردىڭ بارلىعى ءبىر-بىرىنەن وزگەشە بولىپ كەلەدى. سوندىقتان, ءبىزدىڭ قول جەتكىزگەن قوندىرعىلارىمىزداعى كەپتىرۋ, تىعىزداۋ, وSB كىلەمىن ءتۇزۋ سىندى ۇدەرىستەردىڭ بارلىعى وزگە ءوندىرىس ورىندارىندا باسقاشا جۇرگىزىلۋى ىقتيمال. جاڭا قوندىرعىلار ۆاليۋتانىڭ بۇرىنعى باعامى بويىنشا ساتىپ الىنعاندىقتان كاسىپورىننىڭ ورتا جولدا تۇرالاپ قالماۋىنا كوپ سەپتىگىن تيگىزدى. قازىرگى داعدارىس ازىرگە ءوندىرىس بارىسىن قۇرۋعا قيىندىق كەلتىرە قويعان جوق. الداعى ۋاقىتتا ونىمگە سۇرانىس جوسپارداعىداي بولادى دەگەن ويدامىز, – دەيدى كەلەشەككە سەنىممەن قارايتىن زاۋىت ديرەكتورىنىڭ ورىنباسارى ۆيكتور ۆوروبەۆ. وسكەمەندىك ءونىم نەگىزىنەن قازاقستان مەن رەسەي نارىعىنا شىعارىلماق. قازىردىڭ وزىندە الدىن الا تاپسىرىس بەرۋشىلەر بار. ءساتىن سالسا, العاشقى ءونىم كەلەسى ايدان باستاپ نارىققا جولداما الادى. دۋمان اناش, «ەگەمەن قازاقستان». وسكەمەن.