بەلگىلى روك-توبىنىڭ ءانشىسى قايتىس بولدى

استانا. 20 قاڭتار. امەريكالىق بەلگىلى گيتاراشى, الەمگە تانىمال Eagles روك-توبىنىڭ نەگىزىن قالاۋشىلاردىڭ ءبىرى گلەنن فراي 68 جاسىندا قايتىس بولدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. «ۇلگىلى اكە, سۇيىكتى جار, ادال دوس بولا بىلگەن ارداقتى ازامات سوڭعى اپتا بويى رەۆماتويدتىق ارتريت, توقىشەك جاراسى جانە وكپە قابىنۋى دەرتتەرىنە قارسى قانشا كۇرەسكەنىمەن, وكىنىشكە قاراي جازمىشتان وزا المادى», – دەيدى وتباسى جانە ۇجىم مۇشەلەرى. ايتا كەتەيىك, Eagles روك-توبىن العاش فراي جانە حەنلي ەكەۋى 1971 جىلى قۇرعان. ولار One of These Nights, Best of My Love, Life in the Fast Lane, Take it Easy, Tequila Sunrise سىندى بەلگىلى حيت اندەردى بىرىنەن كەيىن ءبىرىن جاريالادى. ارينە ونىڭ ىشىندە Hotel California دا بار. وسىدان كەيىن ۇجىم بۇكىل الەمگە تانىلدى. ءبىر عانا Their Greatest Hits (1971-1975) ءان-جيناعى 29 ميلليون تيراجبەن ساتىلىپ, بۇل جاعىنان مايكل دجەكسوننان كەيىنگى ەكىنشى ورىندا تۇردى. Eagles 1971-1980 جىلدار ارالىعىندا حالىق الدىندا ونەر كورسەتتى. ال 1994 جىلى MTV ارناسىنا جازىلۋ ءۇشىن قايتادان بىرىكتى, 1994-1996 جىلدارى  جاڭا اينالىم ۇيىمداستىردى. وسى ۋاقىت ىشىندە ولار 160 كونتسەرت وتكىزدى. گلەنن فراي Eagles قۇرامىندا جۇرگەندە 1998 جىلى روك-ن-رولل داڭق زالىنا قابىلداندى. ۇجىمنىڭ شىعارماشىلىق تۋىندىلارىنىڭ ساتىلىم كولەمى 100 ميلليوننان اسىپ ءتۇستى. ايان ءابدۋالي. دەرەك, سۋرەت: تاسس.