امەريكالىق ساياساتكەر رەسەي مەن قىتايدىڭ مىقتىلىعىن مويىندادى

استانا. 19 قاڭتار. امەريكالىق ساياساتكەر پول كرەيگ روبەرتس اقش-تىڭ رەسەي فەدەراتسياسى مەن قىتاي حالىق رەسپۋبليكاسىن ساياسي دا, ەكونومكالىق تۇرعىدان دا جەڭە المايتىنىن مالىمدەدى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ساياساتكەر اقش-تىڭ سىرتقى ساياساتى الاياقتىققا نەگىزدەلگەن دەپ ەسەپتەيدى. ونىڭ پايىمداۋىنشا, لاڭكەستىكپەن كۇرەس جۇرگىزەمىز دەگەندى جەلەۋ ەتىپ اقش قازىردىڭ وزىندە اۋعانستان, يراك, سومالي مەن ليۆيانى جويىپ جىبەردى. سونىمەن قاتار, ەگەر «رەسەي پرەزيدەنتى الدىن الماعاندا» يران مەن سيريانى دا تاس-تالقان ەتەر ەدى. روبەرتس قازىرگى تاڭدا ۆاشينگتوننىڭ قۋاتتى بالاماسى رەسەي مەن قىتايدىڭ بەلگىلەنگەن ستراتەگيالىق اليانسى ەكەنىن اتاپ ءوتتى. ساياساتكەر بۇل اليانس اقش ءۇشىن «تىم قۋاتتى بولادى» دەپ سانايدى. بۇل جونىندە: «رەسەي مەن قىتاي وزدەرىنىڭ قاۋىپسىزدىگى مەن ۇلتتىق مۇددەلەرىنە ۆاشينگتوننىڭ قول سۇعۋىنا بۇدان بىلاي جول بەرمەيدى. رەسەي مەن قىتايعا ماڭىزدى ەلدەر وسى اليانسپەن قورعاۋعا الىنادى. بولاشاقتا كوپتەگەن ەلدەر وسى ەكى ەلدەن قورعانىش ىزدەيتىن بولادى», – دەيدى. «بۇلاردان باسقا اقش ىشكى ساياساتتا وتكىر ماسەلەلەردى باستان وتكەرىپ كەلەدى», – دەپ جالعاستىرادى ساراپشى. ال, امەريكانىڭ ءوزى «ەكونوميكالىق ايقاستا جەڭىلىسكە ۇشىرادى». بۇل نەگىزىنەن ەلدە فەدەرالدىق قور جۇيەسى مەن قازىناشىلىق باقىلايتىن بوس قارجى نارىقتارىنىڭ شىنداپ كەلگەندە قالماعانىن كورسەتەدى. «سونداي-اق, ەلدە جۇمىسسىزدىق بەلەڭ الىپ كەلەدى, رەسمي كورسەتكىشتەر 5 پايىز», – دەيدى ساياساتكەر. ساراپشىنىڭ پىكىرىنشە, بۇل سان تىم تومەندەتىلىپ بەرىلگەن. سەبەبى, جاستاردىڭ 50 پايىزى ومىرلەرىن ءوز بەتتەرىنشە قامتاماسىز ەتە الماي وتىر. ونىڭ ويىنشا, «ازعانتاي بانكتەرگە» قىزمەت كورسەتەتىن فەدەرالدىق قور جۇيەسى 2009 جىلداعى داعدارىستان كەيىن ەكونوميكالىق ورلەۋدىڭ كورىنىسىن جاساي الدى. ال بۇل كەزدە تريلليون دوللار باسىلىپ شىعارىلىپ, «ءوز جولدارىن» ەكونومكا ەمەس, قارجىلىق اكتيۆتەر ارقىلى «تاپتى». روبەرتس سىرتقى جانە ىشكى ساياسي فاكتورلاردىڭ جيىنتىعى امەريكالىق ەكونوميكالىق ورلەۋ يدەياسىن مۇلدە ايقىندامايدى دەپ تۇيىندەيدى. ەلامان قوڭىر. دەرەك: ريا «نوۆوستي». سۋرەت: AP Photo.