الماتىدا مۇگەدەكتەردى ماجىلىسكە سايلاۋ ماسەلەسى كوتەرىلدى

الماتى. 19 قاڭتار. الماتىدا «مۇگەدەكتەردى  ماجىلىسكە جانە ماسليحاتقا سايلاۋ» تاقىرىبىندا ءباسپاسوز ءماسليحاتى ءوتتى. بۇل تۋرالى egemen.kz ءتىلشىسى حابارلادى. قازاقستان ءباسپاسوز كلۋبى ۇيىمداستىرعان جيىنعا قازاقستان مۇگەدەكتەر ۇيىمى وداعىنىڭ توراعاسى ءالي امانباەۆ, «شىراق» مۇگەدەكتىگى بار ايەلدەر قاۋىمداستىعىنىڭ ءتورايىمى ءلاززات كالتاەۆا, «نامىس» جوعارى ءبىلىمى بار مۇگەدەكتەر قوعامدىق بىرلەستىگىنىڭ توراعاسى قايرات يماناليەۆ قاتىسىپ, كوتەرىلگەن ماسەلەلەرگە قاتىستى ۇستانىمدارىن ءبىلدىردى. «بۇگىنگى تاڭدا مۇگەدەكتەردىڭ قۇقىقتارى تۋرالى كونۆەنتسيا بەكىتىلگەن. وسى كونۆەنتسياعا سايكەس مۇگەدەكتەر مۇگەدەكتىگى بار ادامدارعا بايلانىستى  ءتۇرلى ستراتەگيالاردى, ساياساتتى جانە باعدارلامالاردى ازىرلەۋگە قاتىسۋى ءتيىس. سونىمەن قاتار, بۇل كونۆەنتسيا مۇگەدەكتەردى ۇكىمەتتىڭ اتقارۋشىلىق جانە زاڭ شىعارۋشى ورگاندارىنىڭ جۇمىسىنا بەلسەندى قاتىسۋعا شاقىرادى وسىعان وراي, ءماجىلىستىڭ ءوز ەركىمەن تاراعانى تۋرالى جانە ءماجىلىس پەن ماسليحاتقا قوس سايلاۋدى قاتار وتكىزۋ جايلى شەشىمدى قولدايمىز. ۇلتتىق دەڭگەيدە ماجىلىسكە جانە ايماقتىق دەڭگەيدە ماسليحاتقا مۇگەدەكتىگى بار ادامدار اراسىنان دەپۋتات سايلايتىن ۋاقىت كەلدى. مۇگەدەكتەر اراسىندا زاڭ اكتىلەرىن ازىرلەۋگە, ءتۇرلى زەرتتەۋلەر جۇرگىزۋگە, ارنايى الەۋمەتتىك قىزمەت ۇسىنۋ باعدارلامالارىن جاساۋعا بەلسەنە قاتىسقان جوعارى ءبىلىمدى جاندار بار. سوندىقتان, ونداي ادامداردىڭ پارلامەنت جانە ءماسليحات جۇمىستارىنا قاتىسۋى قاجەت دەپ ويلايمىز. ولاردىڭ بىلەك ءتۇرىپ, ۇلتتىق جانە ايماقتىق دەڭگەيدە زاڭ شىعارۋ قىزمەتىنە بەلسەنە ارالاسۋى مۇگەدەكتەردىڭ تۇرمىس ساپاسىن جوعارلاتۋ ءۇشىن لايىقتى جاعداي جاساۋعا مۇمكىندىك بەرەدى. بارلىق پارتيالاردى ماجىلىسكە جانە ماسليحاتقا وزدەرىنىڭ سايلاۋ تىزىمدەرىنە مۇگەدەكتەر ۇيىمدارىنىڭ وكىلدەرىن ەنگىزۋگە شاقىرامىز», – دەدى ءباسپاسوز ءماسليحاتىندا ءسوز العاندار. ايناش ەسالي. دەرەك, سۋرەت: egemen.kz.