الەمگە ايگىلى فرانتسۋز جازۋشىسى قايتىس بولدى

استانا. 19 قاڭتار. فرانتسيانىڭ شۋازي قالاسىندا الەمگە ايگىلى جازۋشى ميشەل تۋرنە 91 جاسىندا قايتىس بولدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. 1970 جىلى فرانتسيانىڭ بەدەلدى گونكۋر سىيلىعىن جەڭىپ العان جازۋشى كاتوليكتەر وتباسىنان شىققان. بالا كۇنىنەن مۋزىكا مەن فيلوسوفياعا جانى قۇمار ميشەل تۋرنە سوربوننا جانە تيۋبينگەن  ۋنيۆەرسيتەتىندە ءبىلىم العان. وتكەن عاسىردىڭ 50-60 جىلدارى راديو مەن ءىرى باسىلىمداردا جۋرناليست بولىپ قىزمەت ەتتى. نەمىس ءتىلىن جەتىك بىلگەندىكتەن اۋدارماشىلىق جۇمىستى دا قاتار الىپ ءجۇردى. العاشقى رومانى (Vendredi ou les Limbes du Pacifique) 1967 جىلى جارىق كورگەن. ال 1970 جىلى شىققان كىتابىنىڭ (Le Roi des aulnes) ارقاسىندا گونكۋر جۇلدەسىن جەڭىپ الدى. از ۋاقىتتىڭ ىشىندە بۇكىل الەمگە تانىلدى. سول جىلدارى ايگىلى روماننىڭ تيراجى 4 ميلليونعا دەيىن باردى. 1972 جىلى گونكۋر اكادەمياسىنىڭ مۇشەسى رەتىندە قابىلداندى. كوزى تىرىسىندە-اق, XX عاسىردىڭ كورنەكتى ادەبيەتشىلەرىنىڭ ءبىرى سانالدى. ايان ءابدۋالي. دەرەك: تاسس. سۋرەت: vesti.az.