وسكەمەن. 19 قاڭتار. شىعىس قازاقستان وبلىسىندا تاۋەلسىزدىكتىڭ 25 جىلدىق مەرەيتويى اياسىندا «ءبىر ەل – ءبىر تاعدىر!» اتتى اۋقىمدى اكتسيا ءوتتى. بۇل تۋرالى egemen.kz ءتىلشىسى حابارلادى.
بيىل تاۋەلسىزدىك مەرەيتويى شەڭبەرىندە كەشەندى ءىس-شارالار لەگى ۇيىمداستىرىلادى. وسى شارالاردىڭ مارەسى ىسپەتتى «ءبىر ەل – ءبىر تاعدىر!» اكتسياسى وبلىس ورتالىعىنداعى ەرتىس وزەنىنىڭ سول جاعالاۋىنداعى كومسومول ارالىندا ءوتتى. «جاس وتان» جاستار قاناتى مەن وبلىستىق قازاقستان حالقى اسسامبلەياسىنىڭ قولداۋىمەن وتكەن سالتاناتتى شارا تەاترلاندىرىلعان حورەگرافيالىق كومپوزيتسيامەن باستالدى. شارا بارىسىندا قاتىسۋشىلار مۇز ايدىنى ۇستىندە تاۋەلسىزدىك مەرەيتويىن بىلدىرەتىن «25» سانىن ساپ قۇراپ بەلگىلەسە, تاعى بىرقاتار جاستار 25 شاقىرىمعا شاڭعى جارىسىن ۇيىمداستىردى. وعان وبلىس ورتالىعىنىڭ تۇرعىندارى مەن سپورتشىلار قاتىستى. سونىمەن بىرگە مۇز ايدىنىندا «تورپەدو» كومانداسىنىڭ حوككەيشىلەرى مەن مانەرلەپ سىرعاناۋ شەبەرلەرى, قالا مەكتەپتەرىنىڭ وقۋشىلارى ءوز ونەرلەرىن پاش ەتتى.
بۇل شاراعا وبلىس اكىمىنىڭ ورىنباسارى جاقسىلىق ومارمەن بىرگە وليمپيادا چەمپيونى ولگا رىپاكوۆا دا قاتىسىپ, جاستاردى ءوز ەلى مەن جەرىن, وتانىن قادىرلەپ, قاستەرلەۋگە شاقىردى.
«بيىلعى جىلدىڭ ەلىمىز ءۇشىن ماڭىزى زور. ويتكەنى, تاۋەلسىزدىگىمىزدىڭ 25 جىلدىعىن اتاپ وتەمىز. وسى ۋاقىت ارالىعىندا ەلىمىز كوپتەگەن قيىندىقتار مەن سىناقتاردى ەڭسەردى. بۇگىندە ءبىز ۇلكەن بيىكتى باعىندىرعان ەلمىز. سەبەبى, پرەزيدەنتىمىزدىڭ سارابدال ساياساتىنىڭ ارقاسىندا قازاقستاندى بۇكىل الەم تانىدى. سوندىقتان, مەملەكەتىمىزدىڭ ودان ءارى قاراي ءوسىپ-وركەندەپ, گۇلدەنە بەرۋىنە تىلەكتەسپىز», – دەدى ولگا رىپاكوۆا.
اتالعان اكتسيا ا.پۋشكين اتىنداعى وبلىستىق كىتاپحانادا «ەركىن ەلدىڭ كەمەل تۇلعالارى» اتتى كىتاپ جانە كارتينالار كورمەسىمەن جالعاسىپ, جاس بۋىنعا مەملەكەتتىڭ دامۋ تاريحىندا وزىندىك ورنى بار عيبراتتى عۇمىرنامالار تانىستىرىلدى. سونداي-اق قالا جاستارى بەلگىلى بلوگەر رينات حاليكوۆپەن كەزدەسىپ, «ەل تاۋەلسىزدىگى – ءبىزدىڭ قاسيەتتى قۇندىلىعىمىز!» تاقىرىبىندا پىكىرتالاس ۇيىمداستىردى. اكتسيا سوڭى وڭىردەگى 19 قالا مەن اۋداننىڭ شىعارماشىلىق ۇجىمدارىنىڭ قاتىسۋىمەن وبلىستىق دراما تەاترىندا وتكەن «تۋعان ەل – التىن بەسىگىم!» گالا-كونتسەرتىمەن اياقتالدى.
دۋمان اناش.
دەرەك, سۋرەت: egemen.kz.
