Australian Open تۋرنيرىندە زارينا دياس ءبىرىنشى اينالىمنان اسا المادى

استانا. 19 قاڭتار. اۆستراليادا ءوتىپ جاتقان تەننيستەن Australian Open تۋرنيرىندە قازاقستاندىق سپورتشىلار الا-قۇلا ويناۋدا. ەكى تەننيسشىمىز العاشقى اينالىمنان اسا الماسا, ەكەۋى جارىستى جالعاستىراتىن بولدى. بۇل تۋرالى egemen.kz ءتىلشىسى حابارلادى. ايەلدەر اراسىنداعى سىندا ەل نامىسىن زارينا دياس, يۋليا پۋتينتسەۆا جانە ياروسلاۆا شۆەدوۆا قورعاسا, ەرلەر باسەكەسىندە جالعىز ميحايل كۋكۋشكين باسكە ءتۇستى. وكىنىشكە قاراي, ەلىمىزدىڭ ءبىرىنشى راكەتكاسى, تۋرنيرگە WTA رەيتينگىنە بايلانىستى 52-راكەتكا رەتىندە قاتىسقان, 22 جاستاعى زارينا دياس ءبىرىنشى اينالىمدا امەريكالىق مەديسون كيزدەن جەڭىلدى. قارسىلاسىنا ەكى سەتتە 6:7, 1:6 ەسەبىمەن ەسە جىبەرگەن وتانداسىمىز جارىستى ەرتە اياقتاۋعا ءماجبۇر بولدى. بۇگىندە 20 جاستاعى مەديسون كيز الەمدىك رەيتينگتە 17-ورىندا تۇرعانىن اتاپ وتكەن ءجون. سونداي-اق, ميحايل كۋكۋشكين دە ءبىرىنشى كەزدەسۋىندە جەڭىلىس تاپتى. ول پورتۋگال جواۋ سوۋزدەن 3:6, 4:6, 3:6 ەسەبىمەن جەڭىلدى. قازىرگى تاڭدا كۋكۋشكين اتر تىزىمىندە 94-ساتىدا تۇرسا, سوۋز 33-ورىنعا تابان تىرەگەن. قازاقستاندىقتار اراسىندا العاشقى اينالىمدا ەڭ تاجىريبەلى ءارى مىقتى قارسىلاسقا تاپ بولعان يۋليا پۋتينتسەۆا ەدى. ويتكەنى, الەمنىڭ 76-راكەتكاسى يۋليانىڭ «ءا» دەگەندە 18-ورىندا تۇرعان دات قىزى كارولينا ۆوزنياتسكيمەن جولى ءتۇيىستى. الايدا, ءبىرىنشى سەتتە 1:6 ەسەبىمەن جول بەرگەن پۋتينتسەۆا ەكىنشى سەتتە تاي-برەيك ارقىلى جەڭىسكە جەتتى. ال شەشۋشى سەتتە قازاقستاندىق 6:4 ەسەبىمەن باسىم ءتۇسىپ, سەنساتسيالىق جەڭىسكە قول جەتكىزدى. ەندى ەكىنشى اينالىمدا يۋليا پۋتينتسەۆا قىتاي سەنىم ارتقان حان سينيۋنمەن كۇش سىناسادى. سونىمەن قاتار, ياروسلاۆا شۆەدوۆا دا ءبىرىنشى اينالىمنان سۇرىنبەي ءوتتى. ول العاشقى كەزدەسۋىندە بولگاريالىق تسۆەتانا پيرونكوۆانى 6:4, 6:4 ەسەبىمەن جەڭدى. ەندى ەكىنشى اينالىمدا ياروسلاۆا مەديسون كيزبەن كەزدەسىپ, زارينانىڭ ەسەسىن قايتارىپ كورەدى. ەلامان قوڭىر. دەرەك: egemen.kz. سۋرەت: sports.ru.