وسكەمەندە سۋ تولەماقىسى ارزاندايدى

وسكەمەن. 19 قاڭتار. شىعىس قازاقستان وبلىسىنىڭ ورتالىعىندا سۋ ارناسى قىزمەتىنىڭ تاريفتەرى قايتا قارالدى. بۇل تۋرالى egemen.kz ءتىلشىسى حابارلادى. 2016 جىلدىڭ 1 قاڭتارىنان باستاپ سۋمەن قامتاماسىز ەتۋ قىزمەتىنىڭ باعامى قوسىمشا قۇن سالىعىن ەسەپتەمەگەندە 3,9 پايىزدان 5,5 پايىزعا تومەندەدى. وسكەمەننىڭ ۇلتتىق ءباسپاسوز كلۋبىندا وتكەن بريفينگ بارىسىندا «وسكەمەن سۋ ارناسى» مكك مەن «وسكەمەن گەس اەس» جشس ەنەرگيا ءوندىرۋشى كومپانياسىمەن كەلىسىم بەكىتكەنى بەلگىلى بولدى. وسكەمەننىڭ سۋ تارتۋ جانە سۋمەن قامتۋ جۇيەسىن قامتاماسىز ەتۋگە كۇندەلىكتى 5,5 مەگاۆات ەلەكتر قۋاتى جۇمسالادى. «وسكەمەن گەس-ءى جانىمىزدا تۇرعاندىقتان, تاسىمالداۋعا كوپ شىعىن جۇمسالمايدى. ورتاشا ءتاريفتىڭ شىعىندارىن قايتا ەسەپتەگەننەن كەيىن ەلەكتر قۋاتى وتكەن جىلمەن سالىستىرعاندا 1 كۆت-قا تومەندەدى. بۇل حالىققا ارنالعان ءتاريفتى ازايتۋعا مۇمكىندىك بەرەدى», – دەيدى «وسكەمەن سۋ ارناسى» مكك ديرەكتورى ەرجان اۋباكىروۆ. ناتيجەسىندە, 1 قاڭتار مەن 31 مامىر ارالىعىندا حالىققا ارنالعان سۋمەن قامتۋ باعامى 45 تەڭگەدەن 42,53 تەڭگەگە دەيىن تومەندەسە, سۋ تارتۋ بويىنشا تاريف 39 تەڭگەدەن 37,49 تەڭگەگە دەيىن تومەندەدى. ەرجان اۋباكىروۆتىڭ ايتۋىنشا, ەسكى باعام بويىنشا تولەماقى جاساعان قالا تۇرعىندارىمەن جاڭا تاريف بويىنشا ەسەپ ايىرىسۋ جۇرگىزىلەدى. ايتا كەتۋ كەرەك, ءتاريفتىڭ تومەندەۋىنە بايلانىستى جەكە سۋ ەسەپتەۋ قۇرالى جوق ءبىر ادامنان الىناتىن تولەماقى سۋمەن قامتۋ ءۇشىن 362,21 تەڭگەنى, سۋ تارتۋ ءۇشىن 453,39 تەڭگەنى قۇرايدى. تولەماقىنىڭ جالپى سوماسى قوس قىزمەتتىڭ 39,30 تەڭگەگە تومەندەۋىمەن 815,60 تەڭگەگە تەڭ بولادى. دۋمان اناش. دەرەك, سۋرەت: egemen.kz.