مەملەكەتتىك ستيپەنديا بەرمەك تۇگىلى, مەرەيتويلاردى وتكىزۋگە تىيىم سالعان ەلدەر بار

كەشە الماتىدا مەملەكەتتىك حاتشى گۇلشارا ابدىقالىقوۆا ەلباسىنىڭ تاپسىرماسى بويىنشا بەلگىلى مادەنيەت جانە ونەر قايراتكەرلەرىنە 2015 جىلعى پرەزيدەنتتىك جانە مەملەكەتتىك ستيپەنديالاردى تابىس ەتتى. مەملەكەتتىك حاتشى ءراسىمدى اشا وتىرىپ, قاتىسۋشىلاردى شىن جۇرەكتەن قۇتتىقتاپ, پرەزيدەنتتىك جانە مەملەكەتتىك ستيپەنديالار وتاندىق مادەنيەتتى دامىتۋعا قوسقان ەلەۋلى ۇلەسىنە بەرىلگەن باعا ەكەنىن اتاپ ءوتتى. ال بيىل مەملەكەتتىڭ قارجىلاي قولداۋىنا يە بولعان دارىن يەلەرىنىڭ قۇرامى 40 پايىزعا وزگەرگەن. ستيپەنديا الاتىندار قاتارى جاس دارىندارمەن تولىقتى, وكىنسەك تە, تالاي تاۋ تۇلعالار ومىردەن وزىپ جاتقان جايى بار. ەلباسىنىڭ تاپسىرماسىمەن كەلگەن مەملەكەتتىك حاتشى زيالى قاۋىممەن جۇزدەسۋدە بىلتىرعى جىلعا شولۋ جاساپ, كەلەر جىلدىڭ كەلەلى تىرلىكتەرىنە توقتالا كەلە, ءسوزدى مادەنيەت مايتالماندارىنىڭ وزىنە بەردى. الدىمەن جازۋشىلار اتىنان مەملەكەتتىك سىيلىقتىڭ لاۋرەاتى ءسابيت دوسانوۆ ءسوز الىپ: – الپاۋىت ەلدەردىڭ ءوزى داعدارىستان ەسەڭگىرەپ, الەم وتقا ورانىپ جاتقان قيىن كەزەڭدە تاۋەلسىز قازاقستان بارلىق قيىنشىلىقتاردى ەرلىكپەن ەڭسەرىپ, جارقىن بولاشاققا – ماڭگىلىك ەلگە ءجۇرىپ كەلەدى. ولاي بولسا, سول باعىتىمىزدى زەردەلەپ كورەلىك. كەڭەس وكىمەتى كەزىندە وداقتاس 15 رەسپۋبليكانىڭ تۇگەل تاۋەلسىزدىك العانىمەن, ءبارى بىردەي بىزدەي باقىتتى بولا الماي وتىر. ولاردىڭ كوبىسى ەكونوميكالىق قانا ەمەس, مادەني, ادەبي داعدارىستا. ال بىزدە كىتاپتارىمىز مەملەكەتتىك تاپسىرىسپەن شىعىپ, مەرەيتويلارىمىز ءوتىپ جاتىر. تاۋەلسىزدىكتىڭ العاشقى جىلدارىنداعى قيىن كەزەڭنىڭ وزىندە مەملەكەت باسشىسىنىڭ پارمەنىمەن تاعايىندالعان پرەزيدەنتتىك جانە مەملەكەتتىك ستيپەنديالارىن زيالى قاۋىم 20 جىل بويى ۇزدىكسىز الىپ كەلەدى. كەيبىر ەلدەردەگى قانداستارىمىز مۇنداي قامقورلىققا بولەنبەك تۇرماق, مەرەيتويلارىن وتكىزۋگە تىيىم سالىنعاندىعىن وكىنىشپەن ايتادى, – دەدى. وسىدان كەيىن بەلگىگى قىپشاقتانۋشى الەكساندر گاركاۆەتس, وپەرا ساڭلاعى مايرا مۇحامەدقىزى, تەاتر مايتالماندارى نۇكەتاي مىشباەۆا مەن روزا اشىربەكوۆا ءسوز الىپ, مادەنيەتتىڭ ماسەلەسىن قوزعادى. ەڭ كۇردەلى كەزەڭدەردە دە قامقورلىعىنان ايىرماعان مەملەكەت باسشىسىنا شىنايى العىستارىن ءبىلدىردى. ءبىز جوعارىدا بولاشاعىنان ۇلكەن ءۇمىت كۇتتىرگەن ادەبيەت پەن مادەنيەتتىڭ جاس وكىلدەرى دە مەملەكەتتىك ستيپەنديالارعا ىلىگىپ وتىرعانىن اتادىق. – ادامعا كەيدە جىلى ءسوز, قامقور كوڭىلدىڭ ءوزى كوپ كۇش-قۋات بەرەدى. ال جاس تالانتتار ءۇشىن ۇلتىمىزدىڭ ايتۋلى ازاماتتارىمەن بىرگە مەملەكەتتىك ستيپەندياعا ىلىگىپ, ەلباسىنىڭ قامقورلىعىنا بولەنۋ ولاردى جىگەرلەندىرەدى جانە ۇلكەن مارتەبە, – دەدى جاس اكتەر ءادىل احمەتوۆ. گۇلشارا ابدىقالىقوۆا ەلباسى نۇرسۇلتان نازارباەۆتىڭ زيالى قاۋىمنىڭ جالپىۇلتتىق قۇندىلىقتاردى نىعايتۋعا باستايتىن كۇش رەتىندەگى ۇلاعاتتى ءرولى جونىندەگى ءسوزىن قاتىسۋشىلاردىڭ نازارىنا سالدى. مەملەكەتتىك حاتشى مادەنيەت قايراتكەرلەرىنىڭ يدەيالارى مەن وي-پىكىرلەرى, شىعارمالارى حالىقتىڭ رۋحاني قازىنالارىن, ەجەلگى, باي ءارى وزىندىك ونەرىن ساقتاۋعا جانە ەسەلەۋگە باعىتتالۋى ءتيىس ەكەنىن اتاپ ءوتتى. ستيپەنديالار مەملەكەتتىك قولداۋ كورسەتۋ ماقساتىندا قازاقستان رەسپۋبليكاسىنىڭ قۇرمەتتى اتاقتارى مەن مەملەكەتتىك ناگرادالارىن يەلەنگەن مادەنيەت جانە ونەر قايراتكەرلەرىنە, سونداي-اق, ايتۋلى شىعارماشىلىق جەتىستىگى ءۇشىن دارىندى شىعارماشىل جاستارعا قازاقستاننىڭ مادەنيەتىن جاساۋعا, ساقتاۋعا جانە دامىتۋعا قوسقان ۇلەسى ءۇشىن بەرىلەدى. وتاندىق مادەنيەتتى دامىتۋعا قوسقان ماڭىزدى ۇلەسى ءۇشىن ادەبيەت پەن ونەردىڭ 100 قايراتكەرىنە ستيپەنديالار تاعايىندالدى. ستيپەندياعا يە بولعاندار قاتارىندا ولجاس سۇلەيمەنوۆ, الەكساندر گاركاۆەتس, مىرزاتاي جولداسبەكوۆ, ءسابيت دوسانوۆ, بيبىگۇل تولەگەنوۆا, ەسكەندىر حاسانعاليەۆ, ۆلاديمير تولوكوننيكوۆ, ءاسانالى ءاشىموۆ, يۋري پومەرانتسەۆ, شەرحان مۇرتازا, اكىم تارازي, اناتولي مولودوۆ سياقتى مايتالماندار بار. سونىمەن بىرگە, جانەل ماقاجانوۆا, سانجار ماديەۆ, ءادىل احمەتوۆ, قانات وماروۆ, ەرلان رىسقالي سياقتى بىرقاتار جاس دارىندارعا مەملەكەتتىك قولداۋلار كورسەتىلدى. كەزدەسۋ قازاقستان مادەنيەتى مەن ونەرىن دامىتۋدىڭ وزەكتى ماسەلەلەرىن تالقىلاۋمەن اياقتالدى. مەملەكەتتىك حاتشى ەل تاۋەلسىزدىگىنىڭ 25 جىلدىعى «ماڭگىلىك ەل» جالپىۇلتتىق پاتريوتتىق يدەياسىنىڭ نەگىزىندە بولاشاعى ءبىرتۇتاس ۇلت قالىپتاستىرىپ جاتقان قازاقستان حالقىنىڭ يگىلىگىن, ابىرويى مەن ار-ۇجدانىن پاش ەتەتىن تەرەڭ مازمۇندى جاڭا شىعارمالارمەن اتاپ وتىلەتىنىنە ءۇمىت ءبىلدىردى. الماتىعا جۇمىس ساپارى اياسىندا گۇلشارا ابدىقالىقوۆا, سونداي-اق, قازاقستان جازۋشىلار وداعىنىڭ باسشىلىعىمەن كەزدەسىپ, رەسپۋبليكالىق «قازاق ادەبيەتى» گازەتى مەن «جۇلدىز» جانە «پروستور» جۋرنالدارىنىڭ رەداكتسيالارىن دا بولدى. زيالى قاۋىممەن كەزدەسۋدە وتاندىق ادەبيەتتى ناسيحاتتاۋ, كوركەمدىگى جوعارى شىعارمالاردى ومىرگە اكەلۋ, سونىمەن بىرگە, ەلدىڭ رۋحاني-مادەني سالاسىن ودان ءارى دامىتۋدىڭ وزەكتى ماسەلەلەرى تالقىلاندى. كەزدەسۋ سوڭىندا مەملەكەتتىك حاتشى شىعارماشىل زيالى قاۋىم وكىلدەرى «100 ناقتى قادام» ۇلت جوسپارىن ىسكە اسىرۋعا, قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا وتەتىن مەرەكەلىك ءىس-شارالارعا بەلسەنە قاتىساتىنىنا سەنىم ءبىلدىردى. ايناش ەسالي, «ەگەمەن قازاقستان». الماتى. سۋرەتتى تۇسىرگەن بوريس بۋزين.