كاناداعا ءۇش اي ىشىندە سيريادان 10 مىڭ بوسقىن كەلدى

استانا. 14 قاڭتار. 2015 جىلدىڭ قاراشا ايىنان بۇگىنگە دەيىن سيريادان كاناداعا كەلگەن بوسقىندار سانى 10 مىڭ ادامعا جەتتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. قازىرگى كەزدە قونىس اۋدارعانداردىڭ 5 مىڭعا جۋىعى تولىق قارجىلاندىرىلدى. حالىق اراسىندا وتكىزىلگەن ءىس-شارالاردىڭ, جەكە تۇلعالاردىڭ قايىرىمدىلىق رەتىندە بەرگەن كومەگىنىڭ, سونداي-اق, مەملەكەتتىڭ بولگەن قارجىسىنىڭ ارقاسىندا ولاردىڭ جاعدايى ءبىر قالىپقا ءتۇستى. وتكەن جىلدىڭ 4 قاراشاسىنان بەرى كانادالىق BBC ۇشاعى يوردانيا, ليۆان ەلدەرىنەن ارنايى بوسقىنداردىڭ قونىس اۋدارۋىنا مۇمكىندىك جاسادى. كانادانىڭ كوشى-قون, بوسقىندار مەن ازاماتتىق بەرۋ ىسىنە جاۋاپتى ءمينيسترى دجون ماككالۋم وتكەن جىلى جەلتوقسان ايىنىڭ سوڭىندا, 2016 جىلدىڭ 1 ناۋرىزىنا دەيىن 25 مىڭ سيريالىقتار كوشىپ كەلەتىنىن مالىمدەگەن. الايدا, جەلتوقسان ايىنىڭ باسىندا, سيريادان كەلگەن 35 مىڭ ادامدى قابىلداپ, تولىق جاعداي جاساۋعا مۇمكىنشىلىگى بار ەكەنىن ايتقان بولاتىن: 25 مىڭ بوسقىنعا مەملەكەت تاراپىنان جاردەم كورسەتىلسە, قالعانىنا تۇرعىندار اراسىنان بولىنگەن قايىرىمدىلىقتان كومەك كورسەتىلمەك. دجون ماككالۋم, سونداي-اق, جىل سوڭىنا دەيىن تاياۋ شىعىس ەلدەرىنەن 50 مىڭ ادامنىڭ كەلۋى مۇمكىن ەكەنىن ايتتى. ايتا كەتەيىك, پرەمەر-مينيسترلىك لاۋازىمىنا سايلاۋالدى باعدارلاماسىندا دجاستين تريۋدو 2015 جىلدىڭ 31 جەلتوقسانىنا دەيىن 25 مىڭ سيريالىق بوسقىندى كوشىرۋگە بارىنشا جاعداي جاسالاتىنىن مالىمدەگەن. ايان ءابدۋالي. دەرەك: تاسس. سۋرەت: zmiya.com.ua.