حالىقارالىق «قازاق ءتىلى» قاۋىمداستىعىنىڭ مالىمدەمەسى

حالىقارالىق «قازاق ءتىلى» قاۋىمداستىعى پارلامەنت دەپۋتاتتارىنىڭ ءماجىلىستى تاراتۋ جانە پارلامەنت پەن بارلىق دەڭگەيدەگى ءماسليحاتتاردىڭ مەرزىمىنەن بۇرىن سايلاۋىن تاعايىنداۋ تۋرالى باستاماسىن قولدايدى. قازاقستان تاۋەلسىزدىگىنىڭ 25 جىلدىعى مەملەكەتتى تۇبەگەيلى جاڭعىرتۋدىڭ شەشۋشى كەزەڭىنە جانە الەمدىك قارجى-ەكونوميكالىق داعدارىستىڭ كۇشەيگەن شاعىنا تۇسپا-تۇس كەلىپ وتىر. ەلىمىز مەرەيلى بەلەس جىلىندا اسا جاۋاپتى ەكى ەمتيحاننان دا ابىرويمەن ءوتۋى قاجەت. پارلامەنت دەپۋتاتتارى وتكەن جىلى 5 ينستيتۋتتىق رەفورمانى زاڭنامالىق قامتاماسىز ەتۋ باعىتىندا وراسان جۇمىستار اتقاردى. ەندى ونى ناقتى ءىس جۇزىندە جۇزەگە اسىرۋ كەزەڭى كەلدى. ءبىز قۇرامى قايتا جاڭعىرعان ءماجىلىس ۇلت جوسپارىن جۇزەگە اسىرۋعا جانە «قازاقستان-2050» ستراتەگياسىنىڭ اسقاق مىندەتتەرىن مۇلتىكسىز ورىنداۋعا سەرپىن بەرەدى دەپ سانايمىز. سونىمەن بىرگە, الەمدىك ەكونوميكانىڭ بەت­الىسىنا قاراساق, الدىمىزدا ەڭ كۇردەلى, قيىن كەزەڭ تۇر. ەندەشە, جاھاندىق داعدارىستىڭ كەلەسى, قۋاتتى تولقىنى كەلمەي تۇرىپ, ەلىمىزدىڭ سايلاۋ ناۋقانىنان تەزىرەك ءوتىپ العانى جانە باسقا ەشتەڭەگە الاڭداماي, داعدارىسقا قارسى شارالاردى مۇقيات جۇزەگە اسىرعانى ماڭىزدى دەپ ەسەپتەيمىز. وسىنداي پايىمداردى ۇستانا وتىرىپ, ءبىز – حالىقارالىق «قازاق ءتىلى» قاۋىمداستىعى وتانداستارىمىزدى ەل تاعدىرىنا بەيجاي قاراماي, حالىق قالاۋلىلارىنىڭ باستاماسىن قولداۋعا شاقىرامىز.