ۇلىبريتانيا نيگەريا اسكەرىن «بوكو حارامعا» قارسى دايىندايدى

استانا. 14 قاڭتار. ۇلىبريتانيالىق ماماندار نيگەريالىق اسكەريلەردى «بوكو حارام» لاڭكەستىك توبىنىڭ سودىرلارىنا قارسى كۇرەسكە دايىنداماق. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ۇلىبريتانيانىڭ قورعانىس مينيسترلىگى جىل بويى نيگەرياعا 300-گە جۋىق جاۋىنگەر مەن اسكەري جىبەرىلەتىنىن حابارلادى. اسكەري قىزمەتشىلەردىڭ بۇل توبى وسى ەلدىڭ قارۋلى كۇشتەرىن «بوكو حارام» تەرروريستىك ۇيىمىنا قارسى تۇرۋعا وقىتىپ-ۇيرەتپەك. ۇلىبريتانيا قورعانىس مينيسترلىگىنىڭ حابارلاۋىنشا, ازىرگە اعىلشىن كورولدىك پولكىنىڭ 35 اسكەري قىزمەتشىسى تۋرالى عانا ءسوز بولىپ وتىر. ولار ەلدىڭ سولتۇستىك ايماعىندا تەرروريستەرگە قارسى سوعىسىپ جۇرگەن نيگەريالىق قاۋىپسىزدىك كۇش قۇرىلىمدارىن جاتتىقتىرىپ, وقىتادى. وسىعان وراي ۇلىبريتانيانىڭ قورعانىس ءمينيسترى مايكل فەللون:«ءبىز «بوكو حارام» لاڭكەستىك توبى توندىرگەن ۇلكەن قاۋىپكە قارسى كۇرەستە نيگەرياعا قولداۋ كورسەتەمىز», – دەپ مالىمدەدى. ول سونداي-اق: «ءبىزدىڭ تاراپىمىزدان اسكەري قىزمەتشىلەردى دايىنداۋ باعىتىندا قوسىمشا قولداۋ جاساۋ ەلدىڭ قارۋلى كۇشتەرىنە اسا ماڭىزدى لاڭكەستىككە قارسى ءىس-شارالاردى جۇزەگە اسىرۋدا تىڭ سەرپىن بەرەدى», – دەپ اتاپ ءوتتى. ايتا كەتەيىك, «بوكو حارام» – (حاۋس تىلىنەن اۋدارعاندا «باتىس ءبىلىمى – كۇنا» دەگەندى بىلدىرەدى) نيگەريانىڭ سولتۇستىگى مەن سولتۇستىك-شىعىسىندا لاڭ سالىپ جۇرگەن تەرروريستىك توپ. لاڭكەستىك ۇيىم ەلدىڭ بارلىق اۋماعىندا يسلام حاليفاتىن قۇرىپ, شاريعات تالاپتارىن ەنگىزۋدى كوزدەپ ءجۇر. تەرروريستىك توپ باتىستىڭ ءبىلىم جۇيەسىنە, دەموكراتيا مەن بيلىكتى ءبولۋ پرينتسيپتەرىنە, سونداي-اق, باتىس كيىمدەرىن كيۋگە, وزگە دە «جات» مادەنيەتتىڭ بەلگىلەرىنە تۇبەگەلەيلى قارسىلىق كورسەتىپ كەلەدى. ەلامان قوڭىر. دەرەك: تاسس. سۋرەت: vesti-nedeli.com.