اتىراۋدا ۇشەم بوسانعان 32 جاستاعى ايەل 8 بالانىڭ اناسى اتاندى

اتىراۋ. 14 قاڭتار. جاڭا جىل قارساڭىندا اتىراۋ وبلىسىنىڭ قۇرمانعازى اۋدانىندا تۇراتىن 32 جاستاعى سامال شامحانوۆا ۇشەم بوسانىپ, 8 بالانىڭ اناسى اتاندى. بۇل تۋرالى egemen.kz ءتىلشىسى حابارلادى. بۇعان دەيىن ەرى ديداربەكپەن بىرگە 4 قىز جانە 1 ۇل تاربيەلەپ وتىرعان سامال شامحانوۆا قۇرساعىنا ۇشەم بىتكەندە توبەسى كوككە جەتەردەي قۋانىپتى. ءبىر قوزى ارتىق تۋسا, ءبىر ءتۇپ جۋسان ارتىق شىعادى دەيتىن قازاقى ءتامسىلدى جەتىك بىلەتىن 32 جاستاعى كوپبالالى انا سامال دا مۇنى اللانىڭ ەرەكشە سىيى دەپ قابىلدايدى. ارينە, دارىگەرلەر دە سامالدى ەرەكشە باقىلاۋعا الىپتى. جاڭا جىل قارساڭىندا, ياعني, وتكەن جىلدىڭ 26 جەلتوقسانىندا سامال شامحانوۆا ءۇش ۇلدى ءبىر مەزەتتە جارىق دۇنيەگە اكەلدى. وعان ارينە, وبلىستىق پەرزەنتحانانىڭ دارىگەرلەرى وتا جاساۋ ارقىلى كومەگىن بەردى. ءسويتىپ, اتا-اناسى وزدەرىن كول-كوسىر قۋانىشقا كەنەلتكەن ءۇش ۇلعا الەمحان, ەرحان, تىلەۋحان ەسىمدەرىن بەرىپتى. ۇشەمنىڭ سالماق قوسىپ, جاعدايى جاقسارۋىنا باس-كوز بولىپ جۇرگەن دارىگەر-نەونوتولوگ ايگۇل سۇندەتوۆانىڭ ايتۋىنشا, 18 تاۋلىك بويى ۇشەم ايرىقشا كۇتىمگە الىنىپتى. بۇرناعى كۇنى ومىرگە ىڭگالاپ كەلگەن ۇشەمنەن سوڭ 8 بالانىڭ اناسى اتانعان 32 جاستاعى سامال شامحانوۆا وبلىستىق پەرزەنتحانا دارىگەرلەرىنە العىسىن ايتىپ, ءوزىنىڭ وتباسى تۇراتىن قۇرمانعازى اۋدانىنا اتتانىپ كەتتى. جولداسبەك شوپەعۇل. دەرەك, سۋرەت: egemen.kz.