قازاق راديوسىنان باۋىرجان مومىش ۇلىنىڭ شىعارماسى بەرىلىپ جاتىر

استانا. 14 قاڭتار. قازاق راديوسىنىڭ ەفيرىندە 12-ءشى قاڭتاردان باستاپ باۋىرجان مومىش ۇلىنىڭ «ۇشقان ۇيا» پوۆەسى نەگىزىندە جاسالعان جاڭا جوبا تىڭدارمانعا ۇسىنىلدى. باتىردىڭ وتباسى قۇندىلىقتارىن ناسيحاتتايتىن شىعارماسى قازاق راديوسىنىڭ اۋەتولقىنىنان بەرىلۋدە. بۇل تۋرالى egemen.kz ءتىلشىسى حابارلادى. باۋىرجان مومىش ۇلى باسىنان وتكەرگەندەرى مەن پايىم-تۇسىنىكتەرىن كۇندەلىككە جازىپ وتىرعانى بارىمىزگە بەلگىلى. باتىر كورگەن-بىلگەنى مەن ويلارىن جازۋ ارقىلى ادامداردىڭ ارى مەن نامىسىن, ساناسى مەن ەركىندىگىن وياتا وتىرىپ,  جاقسىلىق جاساۋدى ادام بويىنا ەڭ باستى قاسيەت ەتىپ ءسىڭىرۋ كەرەك دەپ ساناعان. ونىڭ قولىنان بۇل مىندەتتى ورىنداۋ كەلدى. قازاق راديوسىنىڭ ەفيرىنەن «ۇشقان ۇيا» كىتابىنىڭ اۋديونۇسقاسىن تىڭداۋ ارقىلى ءاربىر تىڭدارمان ءبىر وتباسى نەگىزىندە باتىردىڭ تۋعان جەرىندە سول جىلدارى بولعان وقيعالارمەن, كوشپەندىلەر زامانىنداعى قازاق ەتنوگرافياسىنىڭ ەلەمەنتتەرىمەن تانىسا الادى. ءبىر قىزىعى, كىتاپتى جازۋعا باۋىرجان مومىش ۇلىنىڭ 1955 جىلدىڭ ناۋرىزىندا كورگەن ءتۇسى تۇرتكى بولعان. «ۇشقان ۇيا» شىعارماسىندا باۋىرجان مومىش ۇلى اكەسى مەن اجەسىنىڭ ايتقان اقىلى مەن وسيەتتەرى ارقىلى وتباسى تاربيەسىنىڭ ماڭىزدىلىعىن قوزعايدى. اۆتور, سالت-داستۇرلەردى وتباسى مۇشەلەرىنىڭ بەينەسى ارقىلى قىزىقتى ەتىپ باياندايدى. اسكەري شىعارمالار مەن مەمۋارلار جانرىنا جاتاتىن «ۇشقان ۇيا» پوۆەستەر مەن اڭگىمەلەر جيناعى 1976 جىلى قازاق سوتسياليستىك سوۆەت ۇكىمەتىنىڭ مەملەكەتتىك جۇلدەسىن يەلەندى. كىتاپ - حالىقتى مىندەت, ۇلكەنگە قۇرمەت, وتانىنا دەگەن ماحاببات سياقتى قاسيەتتەرگە تاربيەلەيتىن, ۇلتتىق داستۇرلەرىن ۇستانۋعا باۋليتىن شىعارما. «ۇشقان ۇيانىڭ» اۋديو نۇسقاسى قازاق راديوسىنىڭ اۋە تولقىنىنان 12-ءشى قاڭتاردان باستاپ جۇمىس كۇندەرى تاڭەرتەڭگى ساعات 9:35-تە, قايتالاۋى كەشكى 18:35-تە بەرىلىپ جاتىر. داستان كەنجالين. دەرەك: «قازاقستان» رترك ءباسپاسوز قىزمەتى. سۋرەت: egemen.kz