اتىراۋدا اسكەري قىزمەتكەر ءبۇلدىرشىندى قۇتقارۋعا كومەكتەستى

اتىراۋ. 14 قاڭتار. اتىراۋداعى №5546 اسكەري بولىمىندە كەلىسىمشارتپەن قىزمەت ەتەتىن سەرجانت مۇحتار ءوربىسىنوۆ ساۋدا ورنىندا ەسىنەن تانىپ قۇلاعان بالدىرعاننىڭ اجالدان امان قالۋعا قول ۇشىن سوزدى. بۇل تۋرالى egemen.kz ءتىلشىسى حابارلادى. وقيعا تومەندەگىشە وربىگەن. 9 قاڭتاردا كەشكىلىك 22:00 ساعات شاماسىندا اسكەري قىزمەتكەر ۇيىنە تاياۋ ماڭداعى «اتابا» ساۋدا ورتالىعىنا بارعان. سول كەزدە ەسىنەن تانىپ قالعان قىزىن قۇتقارۋ قامىنا كىرىسكەن ەر ادامدى كەزدەستىرەدى. كىشكەنتاي بوبەكتىڭ قىزۋى 40,5 گرادۋسقا كوتەرىلگەن ەكەن. اسكەري قىزمەتكەر مۇحتار ءوربىسىنوۆ «جەدەل جاردەم» شاقىرىپ, ءتىپتى ۇيىندەگى ايەلى سامالعا دا حابار بەرىپ ۇلگەرەدى. «جەدەل جاردەم» بريگاداسى كەلگەنشە فەلدشەرلىك ماماندىعى بار سامالمەن بىرگە العاشقى مەديتسينالىق كومەك كورسەتۋگە كىرىسەدى. ءسويتىپ, ءمادينا ەسىمدى 1,5 جاستاعى كىشكەنتاي بوبەكتىڭ قىزۋىن ءتۇسىرىپ, ءوز-وزىنە كەلۋىنە كومەك قولىن سوزادى. ال «جەدەل جاردەم» بريگاداسى العاشقى مەديتسينالىق كومەكتىڭ دۇرىس جاسالعانى تۋرالى ءوز باعاسىن بەرىپتى. اسكەري قىزمەتكەر مۇحتار ءوربىسىنوۆتىڭ قينالعان جانعا قول ۇشىن سوزعان ازاماتتىعى ءمادينانىڭ اكەسى ەرلان داۋلەتقاليەۆتىڭ №5546 اسكەري ءبولىم كومانديرى بەگايدار قۇرتتىباەۆقا جازعان حاتىنان كەيىن بەلگىلى جاريا بولدى. حات اۆتورى سەرجانت مۇحتار وربىسىنوۆكە قىزىن قۇتقارىپ قالعانى ءۇشىن العىسىن ءبىلدىرىپتى. ەندى اتالعان اسكەري ءبولىم سەرجانتتى ماراپاتقا ۇسىنىپ وتىر. جولداسبەك شوپەعۇل. دەرەك, سۋرەت: egemen.kz.