فيفا باس حاتشىسىن قىزمەتىنەن بوساتتى

استانا. 14 قاڭتار. حالىقارالىق فۋتبول فەدەراتسياسى قاۋىمداستىعى (FIFA) باس حاتشىلىق قىزمەتىن اتقارىپ كەلگەن جەروم ۆالكەنى ورنىنان بوساتتى. بۇل تۋرالى ria.ru سايتىنا سىلتەمە جاساعان egemen.kz ءتىلشىسى حابارلادى. قاڭتاردىڭ 9-ى كۇنى فيفا-نىڭ شۇعىل وتكىزگەن ماجىلىسىندە بۇل شەشىمنىڭ تەز ارادا ءوز كۇشىنە ەنۋى تالقىلاندى. فيفا مەن جەروم ۆالكەنىڭ اراسىنداعى ەڭبەك قارىم-قاتىناسى وسى جەردەن توقتاتىلدى. ال ونىڭ قىزمەت ورنىنا ماركۋس كاتتنەر تاعايىندالدى. ايتا كەتەيىك, جەروم ۆالكە وتكەن جىلدىڭ 17 قىركۇيەك كۇنى برازيليادا وتكەن الەم چەمپيوناتى كەزىندە زاڭسىز جولمەن بيلەت ساتتى دەگەن ايىپ تاعىلىپ, جۇمىسىنان ۋاقىتشا شەتتەتىلگەن. ال 7 قاڭتاردا فيفا-نىڭ اربيتراجدى پالاتاسى ۆالكەنىڭ بۇل ارەكەتىن اشكەرەلەپ شىعاردى. جەروم ۆالكەنىڭ زاڭسىز ارەكەتى بۇل ىسپەن توقتاپ قالعان جوق. سونداي-اق, ۇيىم ىشىندە بولىپ جاتقان سىبايلاس جەمقورلىققا دا قاتىسى بار دەگەن كۇدىك بار. اقش باسشىلىعىنىڭ ايتۋىنشا, ول 2008 جىلى فيفا قورىنان سولتۇستىك پەن ورتالىق امەريكا فۋتبول كونفەدەراتسياسىنا جانە كاريب ەلدەرىنە 10 ميلليون دوللار قارجى اۋدارعان. بۇل ارەكەتىنىڭ باستى سەبەبى, 2010 جىلعى الەم چەمپيوناتىنىڭ وڭتۇستىك افريكا رەسپۋبليكاسىندا وتۋىنە بايلانىستى داۋىس جيناعان. ايان ءابدۋالي. دەرەك, سۋرەت: ria.ru.