استانا. 12 قاڭتار. قازاقستان رەسپۋبليكاسى قارۋلى كۇشتەرىنىڭ اسكەري-تاريحي مۇراجايى باعالى جادىگەرمەن تولىقتى. بۇل تۋرالى egemen.kz ءتىلشىسى حابارلادى.
مۇراجاي قورىنا 1941-1945 جىلدارداعى ۇلى وتان سوعىسىنىڭ باستى جادىگەرى – جەڭىس تۋىنىڭ كوشىرمەسى بەرىلدى.
جەڭىس تۋىنىڭ كوشىرمەسىن ماسكەۋدە وتكەن تمد قورعانىس مينيسترلەرى كەڭەسىنىڭ وتىرىسىندا رف قورعانىس ءمينيسترى سەرگەي شويگۋ قر قورعانىس ءمينيسترى يمانعالي تاسماعامبەتوۆكە تاپسىرعان بولاتىن.
«باتىرىمىز, ۇرپاعىمىز راقىمجان قوشقارباەۆ تىككەن جەڭىس تۋىنىڭ كوشىرمەسى مۇراجايعا تاپسىرىلدى. بالالارىمىز, بولاشاعىمىز ءۇشىن بۇل ۇرپاقتارىمىزدىڭ جەتىستىكتەرى مەن ولاردىڭ قانداي باتىل بولعاندارى تۋرالى ەستەلىكتىڭ نىشانى بولماق», - دەدى قر قك باس شتابى باستىعىنىڭ ورىنباسارى – قر قك بش تاربيە جانە يدەولوگيالىق جۇمىستار دەپارتامەنتىنىڭ باستىعى گەنەرال-مايور مۇحامەدجان تالاسوۆ.
سوعىس الاڭىندا قاسقايىپ تۇرىپ شايقاسقان اتا-بابالارىمىزدىڭ باتىلدىعى بىتە قايناسقان ەلىمىز, قازاقستاندىق ارميانىڭ تاريحى ءۇشىن تۋدىڭ شەجىرەلى ءمانى وتە زور. ەندى جادىگەر قارۋلى كۇشتەرىنىڭ اسكەري-تاريحي مۇراجايىندا لايىقتى ورىن تابادى. ول كەڭەس حالقىنىڭ, ونىڭ ادامگەرشىلىك جانە مورالدىق رۋحىنىڭ قۋاتتىلىعى مەن مىزعىماستىعىنىڭ جارقىن سيمۆولى رەتىندە ۇوس ارنالعان ەكسپوزيتسيادا ورنالاستىرىلادى, سونداي-اق وسكەلەڭ ۇرپاققا اسكەري-پاتريوتتىق تاربيە بەرۋدە پايدالانىلادى.
«سوعىس سۇراپىل بولدى. ميلليونداعان ادامنىڭ ءومىرىن قيدى. بۇل تۋدى ماسكەۋدەن باستاپ سوناۋ بەرلينگە دەيىن جاۋىنگەرلەرىمىز سوعىس مايدانىنان الىپ ءوتىپ, فاشيستىك گەرمانيانىڭ تۋىن تىكتى. بۇل تۋمەن جاۋىنگەرلەرىمىز ءومىرىن قيىپ, ايقاسقا اتتاندى جانە وزدەرىنىڭ اسكەري بورىشىن اتقاردى. جەڭىس تۋى – جەڭىسكە قول جەتكىزگەنىمىزدىڭ نىشانى ىسپەتتى», دەپ اعىنان جارىلدى ۇلى وتان سوعىسىنا قاتىسۋشى ولەگ لينيك.
تۋدى تابىس ەتۋ بويىنشا رەسمي ءىس-شاراعا ۇلى وتان سوعىسى, اۋعان سوعىسىنىڭ ارداگەرلەرى, حالىق قاھارمانى, ارميا گەنەرالى ساعادات نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنىڭ تاربيەلەنۋشىلەرى, سونداي-اق, 68665 اسكەري ءبولىمىنىڭ اسكەري قىزمەتشىلەرى قاتىستى.
قازىردە قر قك اسكەري-تاريحي مۇراجايىنىڭ قورىندا 6 000-عا جۋىق جادىگەر بار ەكەنىن جانە تولىقتىرىلىپ جاتقانىن اتاپ وتكەن ءجون. ەلىمىزدىڭ تۇكپىر-تۇكپىرىنەن ءارتۇرلى ادامدار, كونە زاماننان باستاپ قازىرگى كۇنگە دەيىن تاۋەلسىز قازاقستان قارۋلى كۇشتەرىنىڭ قۇرىلۋى كەزەڭدەرىنەن سىر شەرتەتىن تاريحي قۇندىلىعى بار باعالى زاتتاردى مۇراجايعا تاپسىرۋدا.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
