قىزىلوردادا وقىتۋشىلار مەن ستۋدەنتتەر دوڭگەلەك ۇستەل وتكىزدى

استانا. 12 قاڭتار. قىزىلورداداعى قورقىت اتا اتىنداعى مەملەكەتتىك ۋنيۆەرسيتەتىنىڭ ستۋدەنتتەر سارايىندا ەلباسىنىڭ «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسىنان تۋىندايتىن مىندەتتەر تۋرالى وي-پىكىر بولىسۋگە ارنالعان «قازاقستاندىقتاردى ۇلى مۇراتىنا جەتكىزەتىن باعدارلاما» اتتى دوڭگەلەك ۇستەل ءوتتى. بۇل تۋرالى ۋنيۆەرسيتەتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. دوڭگەلەك ۇستەلدىڭ اشىلۋىندا ۋنيۆەرسيتەت رەكتورى, ت.ع.د., پروفەسسور قىلىشباي بيسەنوۆ ەلباسىمىز نۇرسۇلتان ءابىش ۇلى نازارباەۆتىڭ «ۇلت جوسپارى – قازاقستاندىق ارمانعا باستايتىن جول» اتتى ماقالاسى جاھاندىق داعدارىستارعا قاراماستان 5 ينستيتۋتسيونالدىق رەفورمانى جۇزەگە اسىرۋدىڭ باسىم باعىتتارىن ايقىنداپ بەرگەندىگىمەن ەرەكشەلەنەتىن باعدارلامالىق قۇجات ەكەندىگىن جەتكىزدى. سونداي-اق, جيىنعا قاتىسقان وقىتۋشى-پروفەسسورلار ماقالا اياسىندا ءوز وي-پىكىرلەرىن ءبىلدىرىپ, ەلىمىزدىڭ بۇگىنى مەن ەرتەڭىن, ەكونوميكالىق دامۋى جايىندا باياندامالار وقىدى. باسقوسۋدى قورىتىندىلاعان رەكتور قىلىشباي الدابەرگەن ۇلى بۇل تاقىرىپ الدا تالاي عىلىمي باسقوسۋلاردىڭ نەگىزى بولاتىندىعىن ايتا كەلىپ, قۇندى وي-پىكىرلەرى مەن ۇسىنىمدارىن ورتاعا سالعان عالىمدار مەن ءبىلىم الۋشىلارعا ريزاشىلىعىن جەتكىزدى. تالعات رايىمبەك. دەرەك, سۋرەت: قورقىت اتا اتىنداعى قمۋ-ءنىڭ ءباسپاسوز قىزمەتى.