وپەرانىڭ وتانىن مويىنداتىپ قايتتى

ەسكى جىل ەسىگىمىزدەن شىعىپ, جاڭا جىل بوساعامىزدان اتتاعان ۋاقىتتا ەلىمىزدىڭ مارتەبەسىن مادەنيەت سالاسىندا ءبىر ساتى جوعارىلاتىپ قايتقان «استانا وپەرا» تەاترى سوليستەرىنىڭ جەتىس­تىكتەرىن جەتكىزبەسەك, ۇلت­تىق سي­پاتىمىزعا سىن بولارى ءسوزسىز. ءبىزدىڭ ارتىستەر ءتورت كۇن بويى وپەرانىڭ وتانى سانالاتىن يتالياداعى كارلو فەليچە تەاترىنىڭ ساحناسىندا دج. ءپۋچچينيدىڭ «بوگەما» وپەراسىنىڭ تۇساۋكەسەرىندە ونەر كورسەتتى. وسىعان وراي كەشە پرەزيدەنت جانىنداعى ورتالىق كوممۋنيكاتسيالار قىزمەتىندە ءباسپاسوز ءماسليحاتى وتكەن بولاتىن. ءتورت كۇنگە سوزىلعان وپەرادا ميمي پارتياسىن ايگۇل نيازوۆا, ءرۋدولفتى مەدەت شوتاباەۆ, ميۋزەتتانى سالتانات احمەتوۆا, مارسەلدى تالعات مۇساباەۆ, شوناردى ەۆ­گەني چاينيكوۆ, كوللەندى ارتۇر قايىپقۇلوۆ, ال ەكىنشى قاڭتاردا «استانا وپەرا» سوليستەرىمەن ءميميدى يتاليالىق سوپرانو سەرەنا گامبەرتوني, ءرۋدولفتى لەوناردو كايمي ورىنداعانىن ەستەرىڭىزگە سالامىز. «II Sole 24 Ore Domenica» گازەتىنىڭ ءتىلشىسى قازاقستاندىق جاس ترۋپپاعا, ارتىستەر ەۋروپالىق وپەراعا شىعىس لەبىن قوستى دەپ باعا بەردى. «ەتتورە سكولانىڭ قويىلىمىنا تولىعىمەن قازاق­ستاندىق انشىلەردەن تۇراتىن قۇرامنىڭ تابىس اكەلگەنى ءسوزسىز. وپەرا ساحناسىنىڭ جۇلدىزى – ايگۇل نيازوۆا (ميمي) ءوز پارتياسىن تاماشا مەڭگەرگەنىن پاش ەتتى. مەدەت شوتاباەۆ (رۋدولف) جوعارى نوتانى جاس كەزىندەگى پاۆاروتتي ورىنداعانداي الدى. اسىرەسە, سالتانات احمەتوۆانىڭ تاما­شا ورىنداۋىنداعى ميۋزەتتا ەرەكشە ۇنادى, ونىڭ سىڭعىرلاعان, جارقىن تەمبرى تاڭداي قاقتىرادى. شوناردىڭ پارتياسىن سومداعان ەۆگەني چاينيكوۆتىڭ داۋىسىن­دا باتىسقا ءتان رەڭك بار», – دەلىنگەن 2016 جىلعى 3 قاڭتارداعى ماقالادا. – بۇل رەجيسسەر, ديريجەر, سو­ليس­تەر, وركەستر مۋزىكانتتارى مەن حوردان قۇرالاتىن شەتەلدىك قۇ­راممەن ەۋروپا تەاترى ساحنا­سىندا ايشىقتالعان ماڭىزدى تاجىريبە بولدى. ءبىزدىڭ انشىلەر يتاليالىق ارىپتەستەردەن ەش كەم ەمەس. داۋىس ىرعاعى, اكتەرلىك شەبەرلىگى جاعىنان بارلىعى جوعارى دارەجەدە كورىندى. ءبىز تەك «استانا وپەرا» تەاترىنىڭ عانا ەمەس, بۇكىل قازاقستاننىڭ مارتەبەسىن اسقاقتاتتىق, – دەپ اتاپ ءوتتى جيىن بارىسىندا ءسوز ال­عان قازاقستان رەسپۋبليكاسىنىڭ ەڭبەك سىڭىرگەن قايراتكەرى سالتانات احمەتوۆا. ارتىستەردىڭ ايتۋىنشا, ەكىنشى, ءۇشىنشى, ءتورتىنشى كۇندەردەن سوڭ, قازاق ارتىستەرىن جانكۇيەرلەر سىرتتا قولتاڭبا الۋ ءۇشىن تورۋىلداپ تۇراتىن بولعان. سونىمەن قاتار, يتاليادا وقىپ جاتقان ءبىر توپ قازاقستاندىق ستۋدەنتتەر دە قازاق انشىلەرىن تىڭداۋعا ارنايى كەلگەن. ورىنداۋشىلىق شەبەرلىكتى تىڭدارماندار عانا ەمەس, ديريجەرلەر دە جوعارى باعالادى. قازاقستاندىق انشىلەرگە بولاشاقتا بىرلەسىپ جۇمىس جاساۋ جونىندە بىرقاتار ۇسىنىستار ءتۇسىپتى. سونداي-اق, دج. ءپۋچچينيدىڭ «بوگەما» سپەكتاكلى استانالىق ساحنادا 3 اقپاندا وتەتىنىن دە ەستەرىڭىزگە سالامىز. راۋان قايدار, «ەگەمەن قازاقستان».