«قۇشاقتاعىش كارى شەشەي»

جاڭا جىلدىڭ الدىندا تەحاس­تاعى اۋرۋحانادا 83-كە قاراعان شاعىندا ەليزابەت لەرد دەگەن كەم­پىر قايتىس بولدى. بۇگىنگى كۇننىڭ وزىندە اق ءۇيدىڭ سايتىندا الگى كەيۋا­نانى مەدالمەن ماراپاتتاۋ تۋرالى پەتيتسياعا 90 مىڭنان اس­تام ادام قول قويىپتى. سوندا بۇل امە­ريكالىق اجەي نە بىتىرگەن دەسەڭىزشى؟! فورت حۋد دەگەن اسكەري بازانىڭ ماڭىندا تۇراتىن ەليزابەت لەرد 2003 جىلدان بەرى اۋعانستان مەن يراكقا اسكەري وپەراتسيالاردى ورىنداۋعا اتتانعان امەريكالىق ساربازدارى شىعارىپ سالىپ, قارسى الۋدى داعدىعا اينالدىرىپتى. شىعارىپ سالىپ, قارسى العاندا كەيۋانا ساربازداردى مىندەتتى تۇردە قۇشاعىنا الادى ەكەن. ون ەكى جىلدىڭ ىشىندە ول جارتى ميلليونعا جۋىق جاۋىنگەردى قۇشاقتاپتى. سول سەبەپتى كەيۋانا «قۇشاقتاعىش كارى شەشەي» (the hug lady) دەگەن اتقا يە بولعان. وتكەن جىلدىڭ قاراشا ايىندا ەليزابەت لەرد ءوزىنىڭ سۇيىكتى ورنى – جەرگىلىكتى اۋەجايدان تابىلمادى. سويتسە, كەيۋانا اۋىر ناۋقاسپەن اۋرۋحاناعا تۇسكەن ەكەن. مۇنى ەستىگەن اسكەريلەر مەديتسينالىق مەكەمەگە قاراي اعىلادى. ولىمگە كەتىپ بارا جاتقاندارىندا كارى شەشەي ولاردى قۇشاقتاۋشى ەدى, ەندى ولار ءولىم اۋزىندا جاتقان كەمپىردى قۇشاقتايتىن بولىپتى. بۇدان بولەك, اسكەريلەر ەم-دومنىڭ قاجەتىنە دەپ ساناۋلى كۇننىڭ ىشىندە 93 مىڭ دوللار جيناعان. بىراق تا روجدەستۆو مەرەكەسىنىڭ قارساڭىندا الگى كەمپىر دۇنيە سالدى. كوزى ءتى­رىسىندە ودان ساربازداردى نە ءۇشىن قۇشاقتايسىز دەپ سۇراعان ەكەن. «قۇداي ولاردى دالادا تاستامايتىنىن ءبىلىپ ءجۇرۋ ءۇشىن», – دەپ جاۋاپ بەرىپتى قۇشاقتاعىش كارى شەشەي. قايرات ءابىلدينوۆ, «ەگەمەن قازاقستان». قاراعاندى.