سولتۇستىك قازاقستاندا شەتەل ازاماتى 100 كيلو ەسىرتكىمەن ۇستالدى

پەتروپاۆل. 11 قاڭتار.  ءتارتىپ ساقشىلارى «Isuzu Ascender» جەڭىل كولىگىن تەكسەرۋ كەزىندە وسىمدىكتەكتەس زات سالىنعان ءۇش سومكەنى كەزىكتىردى. سوت-مەديتسينالىق ساراپتاما سومكە ىشىندەگى زات كەپتىرىلگەن ماريحۋانا ەكەنىن انىقتادى. بۇل تۋرالى وبلىستىق ءىىد-ءنىڭ ءباسپاسوز قىزمەتى حابارلادى. قىرعىز رەسپۋبليكاسىنىڭ 46 جاستاعى ازاماتى وبلىس ورتالىعىنداعى ينتەرناتسيونال جانە استانا كوشەلەرىنىڭ قيىلىسىندا بەينەكامەرا ارقىلى قۇرىقتالدى. 100 كيلو كونتراباندالىق جۇك  ەسىرتكى زاتتارى بولىپ شىقتى. قازىر شەتەلدىك ازامات تەرگەۋ وقشاۋلاعىشىنا قامالىپ, ەسىرتكى زاتتارىنىڭ قايدان جانە قانداي ماقساتپەن اكەلىنگەنىنە قاتىستى تەرگەۋ امالدارى جۇرگىزىلۋدە. اتالعان فاكت بويىنشا قىلمىستىق كودەكستىڭ 297-بابى بويىنشا قىلمىستىق ءىس قوزعالدى.  ەسىرتكى تاسۋشىنىڭ كىناسى دالەلدەنسە, 10 جىلعا دەيىن باس بوستاندىعىنان ايىرىلۋى ىقتيمال. «بىلتىر 320 كيلوگرامنان استام ەسىرتكى تاركىلەنىپ, 334 قىلمىستىڭ بەتى اشىلدى», دەيدى ءباسپاسوز قىزمەتىنىڭ ينسپەكتورى يۋري كلىكوۆ. ءومىر ەسقالي. دەرەك, سۋرەت: سولتۇستىك قازاقستان وبلىستىق ءىىد-ءنىڭ ءباسپاسوز قىزمەتى.