قىزىلوردادا وبلىستىڭ باس مەشىتى كۇردەلى جوندەۋدەن ءوتتى

قىزىلوردا. 11 قاڭتار. قىزىلوردا قالاسىنداعى وبلىستىڭ باس مەشىتى دەمەۋشىلىك ەسەبىنەن كۇردەلى جوندەۋدەن ءوتتى. عيماراتتىڭ كۇمبەزى ارلەنىپ, يسلام قاعيداتتارى بويىنشا اياتتار جازىلدى. بۇل تۋرالى egemen.kz ءتىلشىسى حابارلادى. قازىرگى زامانعا ساي جىلىتۋ قازاندىقتارى, بەينەباقىلاۋ, ورتكە قارسى دابىل قۇرىلعىلار ورناتىلدى. ناماز بولمەلەرىنىڭ ەدەنىنە جىلۋ جۇيەلەرى جۇرگىزىلىپ, كىلەمدەرى اۋىستىرىلدى. سونداي-اق, مەشىت جانىنان دارەتحانا سالىنسا, اسحانانىڭ عيماراتى ناۋرىز ايىندا اياقتالاتىن بولادى. ايتا كەتۋ كەرەك, بۇگىندە «نۇر-مۇباراك» ۋنيۆەرسيتەتىندە سىر ءوڭىرىنىڭ 48 شاكىرتى ءبىلىم الۋدا. ونىڭ ىشىندە 11 ستۋدەنتتىڭ وقۋ اقىسى مەن جاتاقحاناسىنا بيۋدجەتتەن تىس كوزدەر ارقىلى قارجىلاي دەمەۋشىلىك جاسالىنىپ, ءوڭىر مەشىتتەرىن جوعارى ءبىلىمدى تەولوگتارمەن قامتاماسىز ەتۋ ماسەلەلەرى شەشىمىن تاۋىپ كەلەدى. بيىل اقپان ايىنان باستاپ اتالعان ۋنيۆەرسيتەتتىڭ ماگيستراتۋراسىن گرانتپەن بىتىرگەن 2 ستۋدەنت قازالى, قارماقشى اۋداندارىندا قىزمەت اتقارادى. قالعان ستۋدەنتتەر ءبىلىم الىپ ەلگە ورالعاننان كەيىن ءدىني تۇراقتىلىقتى ساقتاۋعا ءوز ۇلەستەرىن قوساتىن بولادى. جالپى وبلىستاعى 157 مەشىتتە ءبىر اي بويى ءماۋلىت مەرەكەسىنە وراي ءتۇرلى شارالار ۇيىمداستىرىلاتىن بولادى. ەرجان بايتىلەس. دەرەك, سۋرەت: egemen.kz.