قازاقستاننىڭ قارۋلى كۇشتەرىندە جاڭا وقۋ جىلى باستالدى

استانا. 11 قاڭتار. قازاقستان رەسپۋبليكاسىنىڭ قارۋلى كۇشتەرىندە جاڭا وقۋ جىلى باستالدى. وقۋ جىلى جاۋىنگەرلىك سايىستىڭ «ماڭگىلىك ەل» تۇعىرى – قۋاتتى ارميا!» اتتى ۇرانىمەن وتەدى. بۇل تۋرالى egemen.kz ءتىلشىسى حابارلادى. بيىلعى جىلى قازاقستاندىق ارميانىڭ نەگىزگى كۇش-جىگەرى جاۋىنگەرلىك ازىرلىكتىڭ جوعارى دارەجەسىنە كەلتىرۋ كەزىندە جەكە قۇرامنىڭ ماشىعىن, ءىس-قيمىلدارىن جەتىلدىرۋگە, ەلدى مەكەندەر مەن تاۋلى جەردە ۇرىستى جۇرگىزۋ ءۇشىن بولىمشەلەردىڭ ازىرلىگىن ارتتىرۋ, باسقارۋ جۇيەسىن جەتىلدىرۋ جانە اسكەري قىزمەتشىلەردىڭ دەنە دايارلىعىن شىڭداۋعا باعىتتالادى. سونىمەن قاتار ءارى قاراي جاۋىنگەرلىك دايارلىقتى ۇيىمداستىرۋ, اسكەرلەردى باسقارۋ جانە اسكەرلەردى ماتەريالدىق-تەحنيكالىق قامتاماسىز ەتۋدىڭ ءتيىمدى جۇيەسىن قۇرۋ جاقساراتىن بولادى. وسى جىلى جاۋىنگەرلىك دايارلىقتى جەتىلدىرۋ شەڭبەرىندە قازاقستاندىق اسكەري قىزمەتشىلەردىڭ قاتىسۋىمەن بىرقاتار حالىقارالىق وقۋ-جاتتىعۋلار مەن سايىستاردى وتكىزۋ جوسپارلانۋدا. قۇرلىق اسكەرلەرىندە نەگىزگى كۇش-جىگەر قازىرگى زامانعى قاقتىعىستار مەن قارۋلى شيەلەنىستەردىڭ سيپاتىنا سايكەس اسكەري بولىمدەر مەن قۇرامالاردىڭ جاۋىنگەرلىك جانە جۇمىلدىرۋ ازىرلىگىن ودان ءارى ارتتىرۋعا, جەكە قۇراممەن جۇمىس جاساۋ ساپاسىن ارتتىرۋعا, اسكەري ءتارتىپ پەن قۇقىقتىق ءتارتىپتى نىعايتۋعا شوعىرلاندىرىلادى. اۋە قورعانىسى كۇشتەرىندە جاڭا وقۋ جىلىنا قويىلعان تاپسىرمالار جاۋىنگەرلىك ازىرلىك پەن جاۋىنگەرلىك قابىلەتتىلىكتىڭ جوعارى دەڭگەيىن ۇستاپ تۇرۋ, بارلىق ساناتتاعى اسكەري قىزمەتشىلەردىڭ كاسىبي جانە جەكە دايارلىعىن ارتتىرۋ, قاراپايىم جانە كۇردەلى مەتەوجاعدايلاردا (كۇندىز جانە تۇندە) ۇشۋ قۇرامىنىڭ پيلوتاجداۋ شەبەرلىگىن جەتىلدىرۋ, اۋە ۇرىسىن جۇرگىزۋ, اۋە جانە جەرۇستى نىسانالار بويىنشا جاۋىنگەرلىك قولدانۋ, سونداي-اق اۋە شابۋىلىنا قارسى قورعانىستىڭ جالپى جۇيەسىندە كەزەكشى كۇشتەر مەن قۇرالداردىڭ جاۋىنگەرلىك ازىرلىگىن ارتتىرۋ ماقساتىندا جاۋىنگەرلىك كەزەكشىلىك جۇيەسىن جەتىلدىرۋ بولىپ تابىلادى. اسكەري-تەڭىز كۇشتەرىنىڭ 2016 جىلعى تاپسىرمالارى قر قك اتك باس قولباسشىسىنىڭ باسقارماسىندا جاۋىنگەرلىك كەزەكشىلىكتىڭ ساپالى تۇردە اتقارىلۋىن ۇيىمداستىرۋ, قر قك اتك كورابلدەرىنىڭ 2016 جىلعى ارميا ويىندارىنا قاتىسۋى جونىندە اسكەري باسقارۋدىڭ جوعارى تۇرعان ورگاندارىمەن ءوزارا ءىس-قيمىلدى ۇيىمداستىرۋ, اسكەري-تەڭىز كۇشتەرىنىڭ قۇرىلۋى مەن دامۋىندا تاجىريبە الماسۋ ءۇشىن كاسپي ماڭىنداعى مەملەكەتتەردىڭ اتك-مەن اسكەري-تەحنيكالىق ىنتىماقتاستىق اياسىنداعى ءىس-شارالاردى ۇيىمداستىرۋ بولىپ تابىلادى. داستان كەنجالين. دەرەك, سۋرەت: قازاقستان رەسپۋبليكاسى قورعانىس مينيسترلىگى.