رەسەيدە ناۋقاستى ۇرىپ ولتىرگەن دارىگەر جۇمىسىنان قۋىلدى

استانا. 10 قاڭتار. رەسەيدىڭ بەلگورود قالالىق اۋرۋحاناسىنان ناۋقاستى ۇرىپ ولتىرگەن دارىگەر جۇمىسىنان قۋىلدى. بۇل تۋرالى tengrinews.kz حابارلادى. بەلگورود قالاسىنداعى №2 اۋرۋحانانىڭ دارىگەرى ەمدەلۋشىنى سوققىعا جىعىپ, سالدارىنان ناۋقاس وقيعا ورنىندا قايتىس بولدى. ايتا كەتەيىك, جانتۇرشىگەرلىك جاعداي وتكەن جىلدىڭ 29 جەلتوقساندا قالاداعى №2 اۋرۋحانادا ورىن العان. وندا تەراپيا بولىمشەسىنىڭ دارىگەرى مەيىربيكەگە تيىسكەنى ءۇشىن ەمدەلۋشىنى ۇرىپ ولتىرگەن. وقيعا بەينەباقىلاۋ كامەراسىنا ءتۇسىپ قالعان. كادردان دارىگەر ايەلدىڭ ەمدەلۋشىنى تەكسەرىپ وتىرعانىن كورۋگە بولادى. سول ساتتە كابينەتكە جاس قىزدى ەرىتكەن دارىگەر كىرىپ كەلەدى. ەر ادام ناۋقاسقا كەنەتتەن كۇش كورسەتىپ, سوققىعا جىعادى. سالدارىنان باسىنا تيگەن قاتتى سوققىدان ول قۇلاپ قالادى. ال دارىگەرگە قارسىلىق كورسەتپەكشى بولعان ەمدەلۋشىنىڭ جولداسى دا اۋىر جۇدىرىقتىڭ استىندا قالدى. بىرنەشە ۋاقىتتان كەيىن بولمەدە بولعان ايەلدەردىڭ ءبىرى ناۋقاستىڭ كوگەرىپ كەتكەنىن اڭعارادى. وسى كەزدە «قىزبا» دارىگەر وعان كومەك كورسەتپەكشى بولادى. دەگەنمەن جابىرلەنۋشى وقيعا ورنىندا قازا تابادى. قازىرگى تاڭدا كۇدىكتىگە ەشقايدا كەتپەۋ تۋرالى قولحاتپەن بوساتۋ تۇرىندەگى بۇلتارتپاۋ شاراسى تاعايىندالعان. سەبەبى قىلمىس اۋىر دەڭگەيدەگى كاتەگورياعا جاتپايدى جانە باپتىڭ سانكتسياسى بۇل جاعدايدا ەكى جىلعا دەيىن باس بوستاندىعىنان ايىرۋدى قاراستىرادى. بۇل كاتەگورياداعى قىلمىس ءۇشىن قاماۋعا الۋ دەگەن بۇلتارتپاۋ شاراسىن تاڭداۋ ءۇشىن ەرەكشە جاعدايلار تالاپ ەتىلەدى. جەرگىلىكتى تەرگەۋ كوميتەتىنىڭ ماماندارى دارىگەردىڭ جانە ونىڭ وتباسىنىڭ بەلگورودتا تۇرىپ جاتقانىن, بۇلتارتپاۋ شاراسىن بۇزىپ جاتپاعانىن, سوندىقتان تەرگەۋدە وزگەرىستەر ەنگىزۋگە ايتارلىقتاي سەبەپتىڭ جوق ەكەنىن اتاپ ءوتتى. سونداي-اق, كوميتەتتىڭ ءباسپاسوز قىزمەتىنىڭ حابارلاۋىنشا, كۇدىكتىنىڭ قىلمىسى بايقاۋسىزدا كىسى ءولتىرۋ بولىپ باعالانعان. تالعات رايىمبەك. دەرەك, سۋرەت: tengrinews.kz.