بەرەكە باسى – بىرلىكتە

«قازاقستان تاۋەلسىزدىگىنىڭ شيرەك عاسىرى توپتاسقان حالىقتىڭ عانا دامۋدىڭ تاڭعاجايىپ شىڭ­دارىنا جەتە الاتىنىن دالەلدەپ بەردى». ەلباسى نۇرسۇلتان نازارباەۆ «ۇلت جوسپارى – قازاقستاندىق ارمانعا باستايتىن جول» دەپ اتالاتىن ماقالاسىندا وسىلاي دەدى. جالپى, قاي سوزىندە بولسىن پرەزيدەنتىمىزدىڭ باسا نازار اۋداراتىن ساياساتىنىڭ ءبىرى – ەل بىرلىگى. ونىڭ ءمولدىر باستاۋى حالقىمىزدىڭ «بىرلىك بولماي, تىرلىك بولمايدى» دەگەن اسىل سوزىندە جاتىر. ەلدىڭ اۋىزبىرلىگى تۋرالى جەتى عاسىر بۇرىن جىراۋلار دا كۇڭى­رەنگەن, «قالىڭ ەلىم, قازاعىم, قايران جۇرتىم», دەپ كەشەگى اباي دا وكىنىپ وتكەن. اباي ولەڭدەرىن جاتقا وقيتىن ەلباسى جاقىندا وتكەن ءبىر كەزدەسۋىندە «ءبىرىڭدى, قازاق, ءبىرىڭ دوس, كورمەسەڭ, ءىستىڭ ءبارى بوس» دەگەن اقىن ءسوزىن تاعى دا مىسالعا الدى. مىسالعا الىپ قانا قويعان جوق, وسى ءسوزدى ەرتەڭىنە سەنىمدى ەلىمىزدىڭ ءار اۋىل, ءار قالاسىنىڭ كوشەلەرىنە جازىپ قويۋدى تاپسىردى. ءوزىم باسشىلىق ەتىپ وتىرعان جامبىل وبلىستىق گازەتىنىڭ «اق جول» دەگەن «بوركىنىڭ» ۇستىڭگى جاعىنداعى «اقىلى كوپتى داۋ المايدى, دوسى كوپتى جاۋ المايدى» دەگەن ءسوزدى دە ءبىز ەلباسى ساياساتىنان تۋىنداتىپ قويعانبىز. ەندى ونى گازەتتىڭ ءار سانىندا جاريالاناتىن قازاقستاندىق دوستىق تۋرالى ماقالالاردىڭ ايدارىنا اينالدىرىپ, ورنىنا ەلباسى مىسالعا كەلتىرگەن عيبراتتى شىعارىپ وتىرمىز. «بولىنگەندى ءبورى جەيدى». ءجۇزىن جارنامالاپ, رۋ اتتارىن اتتانداپ جۇرگەن «شولاق بەلسەندىلەرگە» اباي اقىلى, ەلباسى ساياساتى ساباق بولسا ەكەن دەيمىز. جامبىل جەرى ەجەلدەن ۇلتتىق بىرلىكتى سانادا ساق­تاعان, تاتۋلىقتىڭ ورداسى بولعان ءوڭىر. سان ەتنوستىڭ ۇل-قىزىنا قۇت مەكەن بولعان قازاق دالاسىندا بەيبىتشىلىك پەن تۇراقتىلىقتىڭ سالتانات قۇرۋى – ەلباسىمىز نۇرسۇلتان ءابىش ۇلى نازارباەۆتىڭ كورەگەن ساياساتى ارقاسىندا جۇزەگە اسۋدا. ورتاق وتانىمىزدىڭ باستى قۇندىلىقتارىن, اسىل مۇرات­تارىن قۇرمەتتەپ, قاستەرلەۋ – ءاربىر قازاقستاندىقتىڭ پارىزى. ۇلت بولىپ بىرىگىپ, ەلباسىنىڭ الدىمىزعا قويعان ماقسات-مىندەتتەرىن جۇزەگە اسىرۋ – ءاربىر ازاماتتىڭ بورىشى. كوسەمالى ساتتىباي ۇلى, جازۋشى. جامبىل وبلىسى.