اقتوبەدە مەرەكە كۇندەرى 184 ءسابي ءومىر ەسىگىن اشتى

اقتوبە. 5 قاڭتار. اقتوبەدە 31 جەلتوقسان مەن 3 قاڭتار ارالىعىندا 184 بالا دۇنيەگە كەلدى. ونىڭ 101-ءى – ەر, 83-ءى – قىز بالا. بۇل تۋرالى egemen.kz ءتىلشىسى حابارلادى. نارەستەلەردىڭ اراسىندا ءبىر ەگىز بار. شالقار قالاسىندا ەگىز ءسابيىن تولعاتقان ايەلدى وبلىس ورتالىعىنا جەتكىزۋ ءۇشىن سانيتارلىق اۆياتسيا ماماندارى اۋا رايىنىڭ قولايسىزدىعىنا قاراماستان اۋدانعا اتتاندى. جاڭا جىل ادەتتە وتباسىلىق مەرەكە بولىپ ەسەپتەلەدى. سوندىقتان اركىم جاڭا جىلدى وتباسىندا ادەمى قارسى الۋعا اسىعادى. ال قىزمەت بابىمەن ونى جۇمىس ورىندارىندا قارسى الاتىندار دا بار. سولاردىڭ ىشىندە ادام جانىنىڭ اراشاشىسى اق حالاتتى ابزال جانداردىڭ ورنى بولەك. دۇنيە ەسىگىن ايعايلاپ اشاتىن سابيلەردى قابىلداپ الاتىن كىندىك شەشە – دارىگەرلەر ەڭبەگى زور. مىنە, جاڭا جىلدىڭ ءۇش كۇنىندە وسىنشاما پەرزەنتتىڭ كىندىگىن كەسكەن اق جەلەڭدىلەرگە العىستان باسقا ايتارىمىز جوق. «ءتولباسىلاردىڭ» دەنى ساۋ بولىپ, ارتىنان ەرگەن ءىزباسارلارى كوبەيە بەرگەي دەگەن تىلەك كوكەيگە ورالادى. ساتىبالدى ءساۋىرباي. دەرەك: egemen.kz. سۋرەت: vk.com.