بىرقاتار ەلدەر يرانمەن ەلشىلىك قاتىناستى ءۇزدى

استانا. 5 قاڭتار. ساۋد ارابياسى سىرتقى ىستەر ءمينيسترى يرانمەن ديپلوماتيالىق قاتىناستىڭ ۇزىلگەنى تۋرالى مالىمدەمە جاساعاننان كەيىن ونىڭ سوڭىنان بىرنەشە ەل سونداي قادامعا باردى. بۇل تۋرالى ras.kz حابارلادى. ەر-رياد پەن تەگەران اراسىنداعى جانجال 2 قاڭتار كۇنى ساۋد ارابياسىندا تەرروريزمگە قاتىسى بار دەگەن ايىپپەن 47 ادامنىڭ ءولىم جازاسىنا كەسىلگەنىنەن كەيىن تۋدى. جازاعا تارتىلعاندار اراسىندا بەلگىلى شيت ۋاعىزشىسى نيمر ان-نيمر دە بولدى. وسىنىڭ ارتىنشا رەسمي تەگەران وكىلدەرى تاراپىنان ساۋديا بيلىگىنىڭ ارەكەتىن ايىپتاعان وتە قاتقىل مالىمدەمەلەر جاسالدى. قاڭتاردىڭ 3-ىندە كۇنى بويى يران استاناسىندا شەرۋلەر ءوتىپ, جەرگىلىكتى شيتتەر ساۋديا بيلىگىنىڭ ارەكەتىنە قارسىلىق ءبىلدىردى. سونىڭ ىشىندە 400-گە جۋىق ادام ساۋد ارابياسى ەلشىلىگى عيماراتى الدىنا جينالىپ: ء«ال-ساۋدقا (سالمان يبن ابدۋل-ازيز ءال-ساۋد – ساۋد ارابياسىنىڭ كورولى – رەد. ەسكەرتپەسى) ءولىم كەلسىن!» دەپ ايقايلاپ تۇرىپ الدى. سول كۇنى كەشكە ساۋد ارابياسى سىرتقى ىستەر ءمينيسترى ءاديل ءال-دجۋبەير «كورولدىكتىڭ ىشكى ىستەرىنە اشىقتان-اشىق ارالاسقانى, ايماقتا دۇشپاندىق ءىس-ارەكەتتەر جاساعانى جانە كورولدىكتىڭ تەگەرانداعى ەلشىلىگى مەن مەشحەد قالاسىنداعى كونسۋلدىگىنە شابۋىل جاسالعانى ءۇشىن» يرانمەن ديپلوماتيالىق قاتىناستىڭ ۇزىلەتىنى تۋرالى مالىمدەمە جاسادى. ەر-ريادقا ىنتىماقتاستىق رەتىندە 4 قاڭتار كۇنى باحرەين دە يرانمەن ەلشىلىكتىڭ توقتاتىلاتىنىن مالىمدەدى. بۇدان باسقا, افريكاداعى سۋدان مەملەكەتى دە پارسى مەملەكەتىمەن بايلانىستى ۇزەتىنىن جەتكىزدى. تالعات رايىمبەك. دەرەك, سۋرەت: ras.kz.