2015 جىلى قاۋىپتى ايماقتاردا 135 جۋرناليست قازا تاپتى

استانا. 5 قاڭتار. 2015 جىلى قاۋىپتى ايماقتاردا جۇرگەن 135 جۋرناليست سودىرلار قولىنان قازا تاپتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. Press Emblem Campaign جاساعان تىزىمدە جۋرناليستيكا ماماندارى ءۇشىن ەڭ قاۋىپتى ايماق – سيريا ەلى. بۇل ماڭايدا وتكەن جىلى 13 ءتىلشى مەرت بولعان. ءتىزىمدى ءارى قاراي يراك پەن مەكسيكا جالعاستىرىپ تۇر. مالىمەت بويىنشا, بۇل ەلدەردە وتكەن جىلى 10 جۋرناليستەن قازا تاپقان. سونداي-اق, فرانتسيادا Charlie Hebdo باسىلىمىنا شابۋىل جاسالعالى بەرى 9 ءتىلشى كوز جۇمعان. ال برازيليا, ليۆيا جانە فيليپپيندە – 8, گوندۋراستا – 5 ودان بولەك, ۋكراينا مەن كولۋمبيادا 4 تىلشىدەن قازا تاپقان. 2006 جىلدان بەرى Press Emblem Campaign جىل سايىن قىزمەت بارىسىندا مەرت بولعان جۋرناليستەر ءتىزىمىن جاريالاپ تۇرادى. ولاردىڭ ايتۋىنشا, اتالعان جىلدان بۇگىنگە دەيىن باق وكىلدەرىنىڭ 1 مىڭ 184 قىزمەتكەرى كوز جۇمعان. ياعني, ءار جىل سايىن 118 ءتىلشى قازا تابادى دەگەن قورىتىندىعا كەلەدى. الايدا, رەس سوڭعى ءتورت جىل ىشىندە بۇل كورسەتكىش 136-عا جەتكەنىن ايتتى. ال جەلتوقساننىڭ 14 كۇنى بەرگەن مالىمەتتەرىن قايتا وزگەرتۋلەرىنە تۋرا كەلدى. سەبەبى, 31 جەلتوقسانعا دەيىن 7 بىردەي ءتىلشى قاۋىپتى ايماقتا مەرت بولىپ, 2015 جىلى قازا تاپقاندار سانى 135 ادامعا جەتكەن. بيىل بۇل كورسەتكىش بۇدان دا ارتۋى مۇمكىن دەگەن بولجام بار. ايان ءابدۋالي. دەرەك, سۋرەت: تاسس.