پاۆلوداردا الەۋمەتتىك نىسانداردىڭ شاتىرلارى ۇشىپ كەتتى

پاۆلودار. 1 قاڭتار. پاۆلودار وبلىسىندا قاتتى سوققان جەلدىڭ سالدارىنان بىرنەشە الەۋمەتتىك نىسانداردىڭ شاتىرلارى ۇشىپ كەتتى. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى جەلتوقساننىڭ سوڭعى كۇندەرى سوققان قاتتى جەلدەن باياناۋىلدىڭ ۇزىنبۇلاق اۋىلىندا مەكتەپتىڭ, اقسۋدىڭ اقجول اۋىلىنداعى ورتا مەكتەپتىڭ, ەكىباستۇزداعى №7 ورتا مەكتەپتىڭ,«ايگولەك» بالاباقشاسىنىڭ, «نارىق» بازارىنىڭ, ماي اۋدانى ساتى اۋىلىنداعى مادەنيەت ءۇيىنىڭ بىرنەشە مىڭ شارشى مەتردى قۇرايتىن شاتىرلارى ۇشىپ كەتكەن. قازىرگى كۇندەر وقيعا ورىندارىندا كەلتىرىلگەن زارداپتى انىقتاۋ بويىنشا كوميسسيا جۇمىس ىستەپ جاتىر. جاپا شەككەندەر مەن ادام شىعىنى ورىن العان جوق. دەرەك كوزدەرگە سۇيەنسەك, قايتا جوندەۋدەن وتكەن شاتىرلار جەلگە توتەپ بەرە الماعان. ايتا كەتەيىك, وتكەن جىلى ءساۋىردىڭ سوڭىندا سوققان داۋىلدان وبلىستاعى 8 مەكتەپ, ەرتىس اۋدانىندا كوللەدج جاتاقحاناسى, مادەنيەت ءۇيىنىڭ توبەسى, قاشىر اۋدانىندا مادەنيەت ءۇيىنىڭ توبەسى, اقتوعاي اۋىلىنداعى اۋداندىق اگروتەحنيكالىق كوللەدج عيماراتىنىڭ شاتىرلارى ۇشىپ كەتكەن-ءدى. ال مامىر ايىندا ەكىباستۇز, اقسۋ قالالارى, لەبياجى, ماي اۋداندارىندا جالپى اۋماعى 4 مىڭ شارشى مەتردى الاتىن 20 عيماراتتىڭ شاتىرلارى قاتتى جەلدىڭ سالدارىنان وپىرىلىپ تۇسكەن بولاتىن. فاريدا بىقاي. دەرەك, سۋرەت: وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.