ەرتىس وزەنىن ەندەيتىن الىپ كوپىر

بۇل كوپىر وبلىس ورتالىعى مەن اقسۋ قالاسى ارالىعىن قوسادى. استانا, رەسەي, قىتايعا دەيىنگى جول ءجۇرۋ ۋاقىتىن جەدەلدەتەدى. الداعى جىلى بۇل الىپ جوبالار اياقتالىپ, قۇرىلىس پايدالانۋعا بەرىلگەن سوڭ, جول-كولىك ينفراقۇرىلىمىنىڭ دامۋى ءوڭىردىڭ وركەندەۋىنە ءارى قاراي دا ۇلكەن جول اشارى انىق. بۇل رەتتە, «نۇرلى جول» باعدارلاماسى شەڭبەرىندە قولعا الىنعان, ەلباسى تاپسىرماسى بويىنشا قۇرىلىسى جۇرگىزىلىپ جاتقان «استانا-پاۆلودار-وسكەمەن» اۆتوكولىك جولى ۇلكەن سىيلىق بولماق. اۆتوباننىڭ باسىم بولىگى ءبىزدىڭ وبلىس اۋماعىمەن وتەدى. جالپى, «ورتالىق-شىعىس» اۆتوجول ءدالىزىنىڭ بولىگى بولىپ تابىلاتىن جوبانىڭ قۇنى 53 ملرد. 808 ميلليون تەڭگەگە باعالانىپ وتىر. جاڭادان سالىنىپ جاتقان كوپىردىڭ ۇزىندىعى 12,3 شاقىرىمدى قۇرايدى. جول ماماندارىنىڭ ايتۋىنشا, بۇل ورتالىق ازياداعى ەڭ ۇزىن كوپىر بولىپ سانالادى ەكەن. سونىمەن بىرگە, 4 جولاقتى اۆتوبان جوباسى دا ەرتىس وزەنى ارقىلى وتەتىن ەسكى كوپىردەگى اۆتوكولىك قوزعالىسىنىڭ ازايۋىنا سەپتىگىن تيگىزەدى. كەلەر جىلى كوپىر, اۆتوبان پايدالانۋعا بەرىلگەن سوڭ ترانزيتتىك باعىتتا قاتىنايتىن بارلىق كولىكتەر بۇرىنعىداي وبلىس ورتالىعىنىڭ ءىشىن ارالاماي, قالانى سىرتىنان اينالىپ وتە­دى. بۇل قورشاعان ورتاعا دا جاقسى اسەر ەتپەك. ەكىنشىدەن, جاڭا كوپىر, اۆتوبان جوباسى ەۋرازيالىق ەكونوميكالىق وداق شەڭبەرىندەگى ءبىزدىڭ ەلىمىز بەن رەسەيدىڭ بىرلەسكەن العاشقى ءىرى ينفراقۇرىلىمدىق جوباسى بولىپ تابىلادى. كوپىردىڭ قۇرىلىسىنا قولدانىلىپ جات­قان ماتەريالداردىڭ 80 پايى­زى – وتاندىق ونىمدەر. كەن­جە­­­كول اۋىلىندا نەگىزگى قۇرى­لىس كەشەنى ورنالاسقان. مەر­دىگەرلەر قۇرىلىسقا كىرىسپەس بۇرىن وبلىستىڭ قۇرىلىس ين­دۋس­ترياسىنىڭ نارىعىن نى­­­ساناعا الىپ, زەرتتەۋ جا­­ساپتى. ناتيجەسىندە قۇرىلىس رەسۋرستارىنىڭ باسىم بولىگىن وڭىردەگى قۇرىلىس كومپانيالارىنان ساتىپ الۋ تۋرالى شەشىم قابىلداندى. نەگىزگى جۇمىس كۇشى دە وبلىستان تارتىلدى. ال مەتالل قۇرىلعىلار مەن تسەمەنت ەلىمىزدىڭ وزگە وڭىرلەرىنەن جەتكىزىلدى. «قازاۆتوجول» ۇك» اق-تىڭ وبلىستىق فيليالىنىڭ مالىمەتىنشە, قۇرىلىس جۇمىس­تارىنا 10 مىڭ توننا مەتالل جانە 30 مىڭ تەكشە مەتر بەتون قولدانىلادى. قازىر نەگىزگى جۇمىستار ەرتىس وزەنى بويىندا جۇرگىزىلۋدە. ءتيىستى شارالار كەس­تەگە سايكەس اتقارىلۋدا. نىسان 2016 جىلدىڭ جەلتوقسانىندا قولدانىسقا بەرىلەدى. جاڭا اۆتوماگيسترال ەلمىزدىڭ قالالارىن باتىس ءسىبىردىڭ ءىرى ەكونوميكالىق ورتالىقتارى – نوۆوسىبىرمەن, ومبى جانە توم قالالارىمەن جالعايدى. ءتورت جولاقتى اۆتوبان تسەمەنت-بەتوندى جانە اسفالت-بەتوندى جابىندىلارمەن جاسالۋدا. جولدىڭ بويىندا جولاۋشىلارعا قىزمەت ەتەتىن سەرۆيستىڭ بارلىق ءتۇرى بولادى. جاڭا اۆتوبانداعى قۇرىلىس جۇ­مىستارىن جول نارىعىندا تاجىريبەسى بار «دەنا راحساز كونستراكشن», «ابك اۆتودور نس», «قازجولقۇرىلىس», «اقجول» سىندى كومپانيالار جۇرگىزۋدە. ال ەرتىس وزەنىنىڭ ۇستىنەن وتەتىن كوپىر كەشەنىنىڭ تاپسىرىس بەرۋشىسى «قازاۆتوجول» ۇلتتىق كومپانياسى, قۇرىلىستى «قازجولقۇرىلىس» جشس جۇرگىزۋدە. جالپى, قۇرىلىس باسىندا بارلىعى 115 كومپانيا جۇمىس ىستەۋدە. ولاردىڭ جارتىسى جول سالۋمەن اينالىسسا, قالعاندارى قۇرىلىسشىلارعا قىزمەت كورسەتۋدە. وسىنىڭ ار­قاسىندا جەرگىلىكتى 3 مىڭ ادام جۇمىسپەن قامتىلىپ وتىر. جۇمىستار قىس مەزگىلىندە دە جالعاسا بەرەدى. جول ساپاسى ەۋروپالىق تالاپقا ساي. كوپىرلەر اراسىن 9,1 شاقىرىم اۆتوجول جالعاپ تۇرماق. «ورتالىق-شىعىس» اۆتوجول ءدالىزىنىڭ بىرقاتار بولىگى ەۋروپالىق تەحنولوگيامەن سالىنۋدا. ال جالپى اۆتوبان 2017 جىلى سالىنىپ بىتپەك. كەڭ جولاقتى اۆتوباننىڭ 12 شاقىرىمى سۋ ۇستىندەگى كوپىرمەن وتەدى. قۇرىلىس جۇمىستارىن جۇرگىزەتىن مەردىگەر كومپانيا وكىلدەرىنىڭ ايتۋىنشا, اۆتوبان جيەگىنە جاسىل جەلەك وتىرعىزۋ دا جوسپارلانعان. بۇل الىپ كوپىر جوباسىنىڭ جۇزەگە اسىرىلۋى ءوندىرىستى وبلىستا «بىرىڭعاي پاۆلودار-اقسۋ اگلومەراتسياسىن» قۇرۋعا مۇمكىندىك بەرەدى. اقسۋ قالاسىنىڭ دامۋىنا اسەر ەتەدى. اقسۋلىقتار 30 شاقىرىمدىق ارالىقتان جاڭا كوپىر ارقىلى وبلىس ورتالىعىنا جىلدام جەتە الادى دەيدى. وڭىرگە وسىلايشا جاڭا تەحنولگيا, جاڭا­شىلدىقتار, وركەنيەت تالاپتارى كەلە باستادى. ەلىمىز دامۋ جولىن­دا. فاريدا بىقاي, «ەگەمەن قازاقستان». پاۆلودار وبلىسى. سۋرەتتى تۇسىرگەن ۆالەري بۋگاەۆ.