جاپون پارلامەنتشىلەرى – ماجىلىستە

كەشە قازاقستان رەسپۋبليكاسى پارلامەنتى  ءماجىلىسىنىڭ توراعاسى ورال مۇحامەدجانوۆ جاپونيا پارلامەنتى وكىلدەر پالاتاسىنىڭ حالىقارالىق ىستەر جونىندەگى كوميتەتىنىڭ توراعاسى مۋنەە سۋدزۋكي باستاعان دەلەگاتسيامەن كەزدەستى, دەپ حابارلادى ءماجىلىستىڭ ءباسپاسوز قىزمەتى. دوستىق كەزدەسۋدە قازاقستان مەن جاپونيا اراسىنداعى پارلامەنتتىك ىنتىماقتاستىق ماسەلەلەرى تالقىلاندى. ءماجىلىس توراعاسى جاپوندىق ارىپتەستەرىنە 1991 جىلى قازاق­ستان تاۋەلسىزدىگىن العاندا جاپو­نيا العاشقىلاردىڭ ءبىرى بولىپ  قۇتتىقتاعانىن مالىمدەدى. سودان بەرى ەكى اراداعى ەكونوميكالىق, ساياسي جانە گۋمانيتارلىق باي­لا­نىستار كەڭ قانات جايىپ كەلە جاتىر. ەكى جاق تا الەمدەگى بەي­بىت­شىلىك پەن قاۋىپسىزدىك, تۇراقتى­لىققا بىرلەسە ۇمتىلىپ, ەكسترە­ميزم مەن لاڭكەستىككە, جاپپاي قىرىپ-جويۋ قارۋلارىنا بىرلەسە قارسى  تۇرۋدا. وسىعان وراي بيىلدان باستاپ, قازاقستان پرەزيدەنتىنىڭ ۇسىنى­سىمەن 29 تامىز بۇۇ-نىڭ قارا­رى­مەن يادرولىق قارۋعا قارسى حالىقارالىق ءىس-قيمىل كۇنى دەپ بەلگىلەندى. قازاقستان الەمدىك جانە ءداستۇرلى دىندەر كوشباسشى­لارىنىڭ سەزىن وتكىزۋگە باستاما كوتەرىپ, ونى استانادا ءۇشىنشى رەت وتكىزىپ, 2011 جىلى يسلام كون­فەرەنتسياسى ۇيىمىنا توراعالىق جاسايتىن بولادى. 2010 جىلى قازاقستان ەۋرو­پا­داعى قاۋىپسىزدىك جانە ىنتى­ماقتاستىق ۇيىمىنا توراعالىق ەتىپ,  اتالعان حالىقارالىق ۇيىم بەدەلىنىڭ ودان ءارى ارتا تۇسۋىنە بار كۇشىن سالۋدا. ەقىۇ-عا مۇشە مەملەكەتتەر باسشى­لا­رى­نىڭ ءسامميتى الداعى جەلتوق­ساندا اراعا تۇسكەن 11 جىل ءۇزى­لىس­تەن كەيىن استانادا وتكىزىلگەلى وتىرعانى حابارلاندى. جاپوندىق مەيمان ەلىنىڭ قازاقستانمەن ارىپتەستىك بايلا­نى­سىنىڭ كەلەشەگى زور بولا­تى­نىنا سەنىم ءبىلدىردى.  ونىڭ ما­ڭىزدى ءبىر سالاسى ەكى ەل ارا­سىن­داعى پارلامەنتتىك بايلانىستا جاتىر دەپ ەسەپتەيدى جاپوندىق لاۋازىم يەسى. قورىتىندىسىندا ارىپتەستەرىمەن دەلەگاتسيا الما­سىپ, تاجىريبە جالعاستىرۋدى ەكى جاق ءجون كورەتىندىكتەرىن ءبىلدىردى. *  *  * بۇل كەزدەسۋگە جاپونيا پارلامەنتىمەن ىنتىماقتاستىق توبىنىڭ مۇشەلەرى امزەبەك جولشىبەكوۆ, ءسات توقپاقباەۆ, ليۋدميلا حوچيەۆا جانە نۇرتاي سابيليانوۆ قاتىستى.