العاشقى وليمپيادانىڭ الاۋى

وسى كۇندەرى سينگاپۋردە ءى جاس­وسپىرىمدەر اراسىندا جازعى وليمپيا ويىندارى وتۋدە. ونىڭ اشىلۋ سالتاناتى ادەتتەگىدەي ستاديوندا ەمەس, سينگاپۋردىڭ “مارينا بەي” ءىرى ەكونوميكالىق اۋدانىندا ارنايى قورشالعان ساحنادا ءوتتى. بيىلعى وليمپياداعا 205 مەم­لەكەتتەن 3 مىڭ 594 سپورتشى قا­تى­سۋدا. ولار سپورتتىڭ 29 ءتۇرى بويىن­شا 201 مەدال جيىنتىعىن ساراپقا سالادى. وليمپيادا كەزىندە سپورت­شىلار جاس مولشەرىنە قاراي ءبولىنىپ, كۇش سىناسادى. سونىمەن بىرگە كەي­بىر جارىستاردا ۇل-قىزداردىڭ ارالاس كوماندالارى ويناپ, ۇلتتىق وليم­پيالىق كوميتەتتەرىنىڭ وكىلدەرىنەن قۇرالعان قۇرلىقتىق قۇرامالار ارا­سىندا جارىستار وتكىزىلەدى. وليمپيادانىڭ ءبىرىنشى كۇنى قا­زاقستان سپورتشىلارى العاشقى ال­تىن جۇلدەنى جەڭىپ الدى. گرەك-ريم كۇ­رەسىنىڭ بالۋانى, استاناداعى قاجى­مۇقان مۇنايتپاس ۇلى اتىنداعى سپورتتا دارىندى بالالارعا ارنالعان رەسپۋبليكالىق مەكتەپ-ينتەرناتتىڭ تۇلەگى جانىبەك قاندىباەۆ 69 كگ. سالماقتا ءتورت رەت كىلەمگە شىعىپ, جاس­وسپىرىمدەر وليمپياداسىندا تۇڭعىش رەت التىن جۇلدەگە يە بولعان سپورتشى اتاندى. ال وليمپيادانىڭ العاشقى جۇلدەسىن قازاقستان قۇراما­سىنا تاعى دا وسى جارىس تۇرىنەن شىققان احان بايماعامبەتوۆ يەلەندى. ول 42 كگ. سالماق دارەجەسىندە قولا جۇلدەنى قاناعات تۇتتى. وسى جەردە ايتا كەتەتىن نارسە, گرەك-ريم كۇرە­سىنەن بارلىعى بەس سالماق بويىنشا وتكەن بەلدەسۋلەردە بۇرىنعى كەڭەس وداعى رەسپۋبليكالارى بالۋاندا­رى­نىڭ باسىمدىلىعى بايقالىپ تۇردى. مۇندا قازاقستان ءبىر التىن, ءبىر قولا, رەسەي, قىرعىزستان مەن ءازىربايجان ەكى التىن مەدال السا, ۋكراينا مەن وزبەكستان ءبىر كۇمىس جانە ءبىر قولا مەدالدى مويىندارىنا تاقتى. وليمپيادانىڭ ەكىنشى كۇنى سۋعا جۇزۋدەن وتكەن جارىسقا استاناداعى قاجىمۇقان مۇنايتپاس ۇلى اتىنداعى سپورتتا دارىندى بالالارعا ارنالعان رەسپۋبليكالىق مەكتەپ-ينتەرناتتىڭ تۇلەگى ەكاتەرينا رۋدەنكو, وليمپيا­لىق دايارلاۋ ورتالىعىنىڭ وكىلى رۋسلان بايمانوۆ قاتىسىپ, ەلۋ مەترگە ارنالعان جارىستا جارتىلاي فينالعا شىعا الماسا, ال 100 مەترگە ارنالعان “براسس” ءادىسى بويىنشا وتكەن باسە­كە­دە يۋليا ليتۆينا دا جارتىلاي في­نال­دان اسا المادى. ترياتلون ءبا­سە­كەسىندە سىناسقان كارولينا سولوۆە­ۆا 32 سپورتشىنىڭ اراسىندا 21-ءشى بولىپ مارەگە جەتتى. كەشە سپورتتىڭ وسى تۇرىنەن كي­ريلل ۋۆاروۆ جارىسىپ, 27 ورىنعا يە بولدى. ازىرشە وليمپيادانىڭ ءۇش كۇ­نى­نەن كەيىن وتانداستارىمىز جال­پى كو­ماندالىق ەسەپتە 6-شى ورىندا كەلەدى. ارداق توعىموۆ,  ارنايى “ەگەمەن قازاقستان” گازەتى ءۇشىن – سينگاپۋردەن.