وعان وبلىستىق ءماسليحاتتىڭ حاتشىسى, “نۇر وتان” حدپ وبلىستىق فيليالىنىڭ توراعاسى بالعالي ورداباەۆ, وبلىس اكىمىنىڭ ورىنباسارى روزا كەمالوۆا جانە وبلىستىق دەپارتامەنتتەر مەن باسقارمالار باسشىلارى قاتىستى. قوعامدىق كەڭەستە ءسوز العان اقتوبە وبلىسى بويىنشا قۇقىقتىق ستاتيستيكا جانە ارنايى ەسەپكە الۋ كوميتەتى باسقارماسىنىڭ ەسەپكە الۋ ءبولىمىنىڭ باستىعى قۇندىز ولجاباەۆا وسى كەزەڭدە سىبايلاس جەمقورلىققا قاتىستى 59 قۇقىق بۇزۋشىلىق تىركەلگەنىن اتاپ ءوتتى. بۇگىندە 40 ءىس سوت وندىرىسىندە جاتىر. مەملەكەتكە كەلتىرىلگەن 24 ميلليون تەڭگە زياننىڭ 5 ميلليون تەڭگەسى وندىرىلگەن. قوعامدىق كەڭەستە وبلىستىق ىشكى ىستەر دەپارتامەنتىنىڭ باستىعى پاتريس نوكين, وبلىستىق دەنساۋلىق ساقتاۋ باسقارماسىنىڭ باستىعى قايرات سابىر جانە باسقالارى ەسەپ بەردى. سىبايلاس جەمقورلىققا جول بەرەتىندەر اراسىندا اكىمشىلىك قىزمەتكەرلەرى, شەنەۋنىكتەر, پوليتسەيلەر, ءبىلىم سالاسىنىڭ قىزمەتكەرلەرى ءجيى ۇشىراسادى.
ساتىبالدى ءساۋىرباي, اقتوبە وبلىسى.
وداق توراعاسىنىڭ وبلىسقا ساپارى. كوكشەتاۋعا قازاقستان كينەماتوگرافيستەر وداعىنىڭ توراعاسى, رەسپۋبليكامىزدىڭ ەڭبەك سىڭىرگەن مادەنيەت قايراتكەرى يگور ۆوۆنيانكو باستاعان ش. ايمانوۆ اتىنداعى “قازاقفيلم” كينوستۋدياسىنىڭ شىعارماشىلىق توبى كەلدى. الماتى, استانا قالالارىنان كەلگەن قوناقتار ۇلتتىق كينونىڭ قازىرگى احۋالى جايىندا وتكىر اڭگىمە قوزعادى. وداق توراعاسى, رەجيسسەر يگور الەكساندروۆيچ قازاق كينوسىنىڭ ءالى دە وتپەلى كەزەڭدەگىدەي كۇي كەشىپ جاتقانىن ورتاعا سالدى. اۋەسقوي رەجيسسەرلەر ءتۇسىرىپ جاتقان ساپاسىز ديسكىلەر سۇرانىسقا جاۋاپ بەرە الماۋدا. ءبىر عانا جارناما سيۋجەتتەرىنە قىرۋار قارجى جۇمسالاتىن بۇگىنگى كۇنى ولارعا قاتاڭ تالاپ قويۋدىڭ ءوزى قيىن. مەملەكەت تاراپىنان بولىنەتىن قارجى دا شەكەمىزدى شىلقيتقانى شامالى. شەت ەلدەن قىرۋار قارجى شىعارىپ شاقىرتقان مامانداردىڭ قولىنان شىققان دۇنيەلەر ۇلتتىق سيپاتىنان ايىرىلىپ, كۇلكىلى جاعدايعا دۋشار ەتكەنى ءمالىم. قازىر كۇرت بەتبۇرىس جاسايتىن ۋاقىت. وسىعان بايلانىستى 2008 جىلدان باستاپ “ۇلتتىق كينو كۇنى” اكتسياسى قولعا الىندى. كەلەسى, 2011 جىلى وسى اكتسيا شەڭبەرىندە اقمولا وبلىسىندا “بالاپان” حالىقارالىق كينەماتوگرافيالىق فەستيۆالىن وتكىزۋ كوزدەلىپ وتىر. ونىڭ تاقىرىبى اتىنان كورىنىپ تۇرعانىنداي, بالالار كينوسىن دامىتۋدىڭ وزەكتى ماسەلەلەرىنە ارنالماق.
باقبەرگەن امالبەك, اقمولا وبلىسى.
استىق قابىلداۋعا دايىندىق. قىزىلجار وڭىرىندە تالاپقا ساي جابدىقتالعان استىق ساقتاۋ قويمالارى جەتىسپەگەندىكتەن, ىرىس ءدانىن تازالاۋ, كەپتىرۋ جايى ءالى دە سىن كوتەرمەيدى. سولتۇستىكتىڭ استىعىن ساقتاۋعا جالپى سىيىمدىلىعى 3 ميلليون تونناعا جەتەعابىل 49 ەلەۆاتوردىڭ كۇش-قۋاتى جەتە بەرمەيدى. سوڭعى جىلدارى ولقىلىقتاردى تۇزەۋ ماقساتىندا وسى زامانعى ەلەۆاتورلار سالۋ ءورىس الا باستادى. سولاردىڭ ءبىرىن “زەنچەنكو جانە ك” كومانديتتىك سەرىكتەستىگى قولعا الىپ وتىر. جوبانىڭ قۇنى – 2,3 ميلليون اقش دوللارى. سىيىمدىلىعى – 35 مىڭ توننا. قۇرىلىس جۇمىستارىمەن قىتايلىق “Land Company” كومپانياسى اينالىسادى. وسىدان بەس اي بۇرىن اققايىڭ اۋدانىنىڭ ورتالىعى – سميرنوۆو تەمىرجول ستانساسىندا ىرگەتاسى قالانعان كاسىپورىن بيىلعى جىلدىڭ استىعىن قابىلداۋعا ءازىر ەتىلمەك. اگروقۇرىلىمنىڭ باس ديرەكتورى, قازاقستاننىڭ ەڭبەك ەرى گەننادي زەنچەنكونىڭ ايتۋىنشا, قۇرال-جابدىقتار اقش-تان, گەرمانيادان اكەلىنىپ, 20 ادام تۇراقتى جۇمىسپەن قامتىلاتىن بولادى.
ءومىر ەسقالي, سولتۇستىك قازاقستان وبلىسى.
كورىكتى جارناما — كوركەم ءتىل. جۇما كۇنى ا.توقماعانبەتوۆ اتىنداعى مادەنيەت ۇيىندە وبلىستىق تىلدەردى دامىتۋ جونىندەگى باسقارمانىڭ ۇيىمداستىرۋىمەن “كورىكتى جارناما – كوركەم ءتىل” اتتى وبلىستىق بايقاۋ ءوتتى. مەملەكەتتىك ءتىلدىڭ قولدانىس اياسىن كەڭەيتۋ, جارنامالاردىڭ قازاق تىلىندە جازىلۋى مەن كوركەمدىك ساپاسىن جاقسارتۋ ماقساتىن كوزدەگەن بۇل بايقاۋعا قاتىسۋشىلار ءوز ءونىم تۇرلەرىن ساراپقا سالدى. بايقاۋ قورىتىندىسىندا “قىزىلوردا ديزاين” جارناما اگەنتتىگى جەڭىمپاز دەپ تانىلىپ, تۇرعىن ءۇي قۇرىلىس جيناق بانكىسى مەن “كارتەل” بايلانىس جۇيەسى جۇلدەلى ورىنداردى ءبولىستى.
ەركىن ءابىل, قىزىلوردا.
“دەنساۋلىق” پويىزى تەگىن قىزمەت كورسەتتى. رەسپۋبليكالىق “دەنساۋلىق” اكتسياسى بويىنشا جۇزەگە اسىرىلىپ جاتقان دارىگەرلىك پويىزى جاقىندا وسكەمەنگە اتباسىن تىرەدى. دەنساۋلىق پويىزى قۇرامىندا ءتىس دارىگەرى, تەراپەۆت, بالالار دارىگەرى, بارلىعى 20-عا تارتا قىزمەت كورسەتەتىن ماماندار, ءتىپتى قان قۇرامىن انىقتايتىن لابوراتوريا, رەنتگەنگە تۇسىرەتىن قىزمەت تۇرلەرى بار. دارىگەرلىك كومەك كورسەتەتىن پويىز تەمىرجولشىلار مەن ولاردىڭ وتباسىلارىنا تەگىن قىزمەت كورسەتتى. سوسىن ولار جاقىن ماڭداعى تەمىرجول ستانسالارى مەن رازەزدەرگە بارىپ, ونداعى قىزمەتكەرلەردى تەكسەردى. ءاربىر بەكەتتەردە ەكى كۇن بولىپ, بارلىق ادامداردى دارىگەرلىك تەكسەرۋدەن وتكىزگەن اق جەلەڭدى ابزال جاندارعا جەرگىلىكتى تۇرعىنداردىڭ العىسى شەكسىز.
وڭداسىن ەلۋباي, شىعىس قازاقستان وبلىسى.
سۇلۋاعاش اۋىلىنداعى جيىن. سارىكول اۋدانىنداعى سۇلۋاعاش اۋىلىندا اتالار ارۋاعىنا ارناپ اس بەرىلدى. مۇنداي جيىن قازىر كوپشىلىككە تاڭسىق بولماۋى مۇمكىن. بىراق سۇلۋاعاشتىقتار ءۇشىن مۇنىڭ ماڭىزى ۇلكەن. سەبەبى, بۇل 90-شى جىلدارى توز-توزى شىققان اۋىلدىڭ العاشقى ەڭسە كوتەرگەنى بولاتىن. اۋىل ازاماتتارى ا.قاسىموۆ, ح.الداەۆ, ى.دۇيسەكەەۆ, ق.قارپىقوۆ, ب.بەكبولاتوۆ جەرگىلىكتى اكىم م.ق ۇلىمبەكوۆتىڭ باسشىلىعىمەن اتالار قورىمىن قورشادى. اۋىلدى كوركەيتۋ جۇمىسىنا دا تۇرعىندار اتسالىستى. استا وسى وڭىردەن شىققان اسپانتاي اۋليە, بۇحارانىڭ ءامىرى بولعان نياز تۋرالى ا.جولامانوۆ ايتقان اڭگىمە دە جاستارعا قىزىقتى بولدى. ال كورشى تيميريازەۆ اۋىلىندا “ولار جەڭىسپەن ورالدى” دەگەن ماڭگىلىك وت بەلگىسى قويىلدى.
ءنازيرا جارىمبەتوۆا, قوستاناي وبلىسى.
كەلەسى كەزدەسكەنشە, “جاسىباي تولقىنى”! باياناۋىلدىڭ جاز كۇندەرىنىڭ اسەرلەرى كوپ-اق. سونىڭ ءبىرى – وتكەن اپتادا جاسىباي كولى جاعاسىن قىزىقتى, كوڭىلدى, تاپقىر ويىندارعا ارناعان قازاق كۆن ويىنشىلارىنىڭ باسقوسۋى بولدى. جىل سايىن ءوتىپ تۇراتىن تاپقىرلار كلۋبى ويىنىن, ياعني “جاسىباي تولقىنى” اتالاتىن بۇل فەستيۆالعا قاتىسۋشىلاردى كۆن وداعىنىڭ پرەزيدەنتى ەسەن ەلەۋكەن باستاپ كەلدى. ەلىمىزدىڭ ءار تۇكپىرىنەن – تاراز, شىمكەنت, قىزىلوردا, اتىراۋ, قاراعاندى, جاڭاوزەن قالالارىنىڭ جاستارى ويلى دا ءماندى, قىزىقتى, ۇتىمدى, تاپقىر ويىندارىمەن كوزگە ءتۇستى. كول جاعاسىنداعى مەرەكەگە انا ءتىلىن سۇيەتىن جاستار دا كوپ جينالدى. قازىرگىدەي قازاق ءتىلىنىڭ تاعدىرى تارازىعا ءتۇسىپ, سالماقتىلىعى ولشەنىپ جاتقان وسىناۋ ءبىر ۋاقىتتا جاستارىمىزدىڭ تۋعان تىلدەرىن ناسيحاتتاپ, ءورىسىن كەڭەيتىپ جاتقاندارىنا قۋاندىق. بۇل جولى استانالىق “سپارتا” كومانداسى جەڭىمپاز اتاندى.
فاريدا بىقاي, پاۆلودار وبلىسى.
