جىل سايىن جاپونيانىڭ حيروسيما قالاسىندا اتوم بومباسىنان قازا تاپقانداردى ەسكە الۋ شارالارى وتەدى. بيىل العاش رەت وعان سول اتوم بومباسىن تاستاعان اقش ەلىنىڭ وكىلى دە قاتىسىپ وتىر. سونداي-اق ونىڭ وداقتاستارى بولعان ۇلىبريتانيا مەن فرانتسيا وكىلدەرى دە كەلىپتى. ەڭ باستىسى – شاراعا بۇۇ باس حاتشىسى پان گي مۋن قاتىستى. ءسىرا, سەمەي پوليگونىنداعى العاشقى جارىلىس بولعان كۇنى سىناقتىڭ زاردابىن شەككەندەردى دە ەسكە الىپ جاتساق, ءجون سياقتى-اۋ.
قاستاندىق پا, قۋانىش پا؟
يران پرەزيدەنتى ماحمۇد احمادينەجادقا قاستاندىق جاسالدى دەگەن حاباردى, بالكىم, الەمنىڭ بارلىق اقپارات قۇرالدارى تاراتقان شىعار-اۋ. ونىڭ مازمۇنى: لاقتىرىلعان گراناتا پرەزيدەنتكە جەتپەگەن, جەتسە ونى قاتتى جارالاۋى مۇمكىن ەكەن. ويتكەنى, بۇل گراناتا جۋرناليستەر مىنگەن اۆتوبۋستى ايتارلىقتاي زاقىمداپ, ونداعى ءبىراز ادام جاراقات الىپتى. شىن مانىندە بۇل ەشقانداي قاستاندىق ەمەس, ول پرەزيدەنتتىڭ كەلگەنىنە ءوز قۋانىشىن بىلدىرگەن ادامنىڭ ءوزى جاساعان ويىنشىعىنىڭ جارىلىسى عانا ەكەن. جارالانعان جۋرناليستەر دە جوق كورىنەدى. قاستاندىق بولماعانىن پرەزيدەنت اكىمشىلىگى ايتىپ وتىر.
اعاش ءۇشىن اتىسىپتى
يزرايل مەن ليۆان شەكاراسىندا اتىس بولىپ, ودان بەس ادام: ءتورت ليۆاندىق جانە ءبىر يزرايلدىك اسكەري قازا تاپقان. ليۆان جاعىنىڭ ايتۋىنشا, يزرايل سولداتتارى شەكارادان ءوتىپ, اعاش كەسە باستاپتى. ال وسىنداعى بۇۇ-نىڭ ۋاقىتشا كۇشتەرىنىڭ وكىلى كەسىلگەن اعاش يزرايل اۋماعىندا ەكەنىن ايتادى. قالاي بولعاندا دا, اعاش ءۇشىن اتىستان ادامدار ولگەن.
كولۋمبيادا – جاڭا پرەزيدەنت
سەنبى كۇنى كولۋمبيانىڭ جاڭا پرەزيدەنتى حۋان مانۋەل سانتوستىڭ قىزمەتىنە كىرىسۋ ءراسىمى ءوتتى. جۇرت نازارىن اۋدارعان ءبىر جاي – جاڭا پرەزيدەنت كۇنى كەشە ديپلوماتيالىق قاتىناستارىن ۇزگەن كورشى ەل ۆەنەسۋەلامەن ءتىل تابىسۋعا ۇمتىلاتىنىن مالىمدەدى. بۇعان كورشى ەلدىڭ اتىنا ءبىراز قاتتى ءسوز ايتىپ قالعان ۆەنەسۋەلا پرەزيدەنتى ۋگو چاۆەس بارىنشا ىقىلاسپەن ءۇن قاتتى. ءيا, بۇل ونىڭ ءوزى ورىنسىز باسقان قادامداردان قايتقان ءبىر ءساتى.
لاڭكەستىك قايدان؟
يراكتا لاڭكەستىك ارەكەتتەر بارعان سايىن ءورشي تۇسۋدە. شىلدە ايىندا ودان 535 ادام قازا تاپقان. نەگە دەگەن سۇراققا جاۋاپتى جۇرت يسلامنىڭ ەكى تارماعى: شيزم مەن ءسۋننيزمنىڭ اراسىنان ىزدەيدى. لاڭكەستىك ارەكەتتەر كوكتەمدەگى پارلامەنت سايلاۋىنان كەيىن كوبەيگەن. ەلدە الىگە دەيىن ۇكىمەت قۇرىلعان جوق. ونىڭ باسشىلىعىنا ء“ال-يراكيا” سۋننيتتىك بلوكتىڭ جەتەكشىسى اياد اللاۋي مەن شەيتتەردىڭ كوسەمى, قازىرگى پرەمەر-مينيستر نۋري ءال-ماليكي تالاسىپ ءجۇر. ولاردى قولدايتىندار ءبىر-بىرىنە قارسى لاڭكەستىك ارەكەتتەرگە دە باراتىن كورىنەدى.
سىرتقا – تىيىم
رەسەي پرەمەر-ءمينيسترى ۆلاديمير پۋتين قۇرعاقشىلىققا بايلانىستى رەسەي اۋماعىنان استىقتى ەكسپورتقا شىعارۋعا ۋاقىتشا تىيىم سالىناتىنىن مالىمدەدى. بۇل تىيىم جىلدىڭ سوڭىنا دەيىن جوسپارلانىپ وتىر. ودان كەيىنگىسى بەلگىسىز. بۇل مالىمدەمەدەن كەيىن استىقتىڭ باعاسى دۇنيە جۇزىندە شارىقتاپ شىعا كەلگەن. ايتالىق, سول استىقتى كوپ وندىرەتىن اقش-تىڭ وزىندە ول 70 پايىزعا وسكەن. رەسەي ءوزىنىڭ كەدەندىك ارىپتەستەرى بەلارۋس پەن قازاقستاننان دا سولاي ەتۋدى وتىنسە كەرەك. اركىم وزىنشە شەشكەنى ءجون, ارينە. قازاقستان ازىرگە استىقتى سىرتقا شىعارۋعا تىيىم سالامىن دەپ وتىرعان جوق.
ءان ايتىپ ەل باسقارماق
بيىل گايتيدە قاتتى جەر سىلكىنىسىنەن كەيىن العاش رەت پرەزيدەنت سايلاۋى وتەدى. امەريكالىق رەپەر ۋايكلەف دجين پرەزيدەنتتىككە كانديدات بولىپ تىركەلىپتى. بىرقاتار ساراپشىلاردىڭ پىكىرىنشە, ونىڭ مۇمكىندىگى اجەپتەۋىر جوعارى كورىنەدى. جاستار اراسىندا تانىمال ەكەن. بىراق ەل باسقارۋ ولەڭ ايتىپ ءجۇرىپ اتقاراتىن شارۋا ەمەس-اۋ.
قايىرىمدى قۇمارپاز
امەريكانىڭ لاس-ۆەگاس قالاسىنداعى اتىن جاسىرىپ جۇرگەن ءبىر باي ادام زارۋلىككە ۇشىراعاندارعا 1 ميلليارد دوللارداي قارجى ۇلەستىرىپ ۇلگەرىپتى. ونىڭ الدىندا سوناۋ باستا دۇنيە تابۋدىڭ ەكى جولى تۇرعان ەكەن: ءبىرى – ەسىرتكى ساۋداسى, ەكىنشىسى – قۇمار ويىن. سوڭعىسىن تاڭداعان ول ايتارلىقتاي قارجى جيناپ, ەندى ونى مۇقتاجدىق كورگەندەرگە بەرىپ جۇرگەن كورىنەدى. ول وسىناۋ يگى ىسكە باسقا بايلاردى دا شاقىرىپتى.
ازىرلەگەن ماماديار جاقىپ.
