جاپونيادا الەمدەگى ەڭ ۇزاق ءومىر سۇرگەن ەر كىسى قايتىس بولدى

استانا. 7 شىلدە. جاپونيادا 113 جاسقا قاراعان شاعىندا الەمدەگى ەڭ ۇزاق ءومىر سۇرگەن ەر ادام ساكاري موموي ومىردەن ءوتتى. ول سوزىلمالى بۇيرەك جەتىمسىزدىگىنە شالدىققان. بۇل تۋرالى «قازاقپارات» حابارلادى. ساكاري مومومي وسى جىلدىڭ اقپان ايىندا توكيوداعى مەديتسينالىق مەكەمەلەردىڭ بىرىندە وتباسىمەن ءوزىنىڭ 112-گە تولعان تۋعان كۇنىن اتاپ وتكەن بولاتىن. ال 2014 جىلدىڭ تامىز ايىندا ساراپشىلارى ونى عالامشارداعى ەڭ ەگدە ەر ادام دەپ تانىپ, گيننەستىڭ رەكوردتار كىتابىنا ەنگىزدى. ايتا كەتەيىك, ساكاري موموي 1903 جىلى حونسيۋ ارالىنىڭ سولتۇستىك-شىعىسىنداعى فۋكۋسيما پرەفەكتۋراسىندا دۇنيەگە كەلگەن. ءومىر بويى اگروحيميادان ساباق بەرىپ, بىرنەشە مەكتەپتەردە ديرەكتور قىزمەتىن اتقارعان. تۋىستارىنىڭ ايتۋىنشا, ءومىرىنىڭ سوڭىنا دەيىن ونىڭ اقىل-ەسى دۇرىس بولعان. ول ءوز بەتىنشە كىتاپ وقىپ, سپورتتىق باعدارلامالار كورگەن. تالعات رايىمبەك. دەرەك, سۋرەت: «قازاقپارات».