جامبىل وبلىسىندا تەمىربەك قوجاكەەۆكە ەسكەرتكىش قويىلدى

تاراز. 2 قىركۇيەك. جامبىل وبلىسى مەركى اۋدانى ورتالىعىنداعى №39 ورتا مەكتەپ-گيمنازياسىنا بەلگىلى عالىم, فيلولوگيا عىلىمدارىنىڭ دوكتورى, پروفەسسور تەمىربەك قوجاكەەۆتىڭ ەسىمى بەرىلدى. بۇل كۇنى ءبىلىم ورداسىنا عالىمنىڭ ەسكەرتكىشى قويىلىپ, مەكتەپ ىشىنەن تەمىربەك قوجاكەەۆ اتىنداعى مۋزەي دە اشىلدى. بۇل تۋرالى egemen.kz ءتىلشىسى حابارلادى. قازاق جۋرناليستيكاسى مەن ساتيراسىنىڭ تەورياسىن, تاريحىن زەرتتەگەن بەلگىلى عالىم, ۇلاعاتتى ۇستاز تەمىربەك قوجاكەەۆتىڭ ەلىنە سىڭىرگەن ەڭبەگى زور. ول ۇزاق جىلدار بويى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن باسقارىپ, مىڭداعان شاكىرتتەر تاربيەلەدى. بۇگىندە قازاق جۋرناليستيكاسىندا ۇستازدىڭ ازاماتتىعى مەن قايراتكەرلىگى, تۋرالىعى مەن ەڭبەكسۇيگىشتىگى اڭىز بولىپ ايتىلادى. سودان بولار بۇل ءىس-شاراعا الماتى مەن استانادان, وزگە دە ايماقتاردان بەلگىلى عالىم-جازۋشىلار, ساتيريكتەر مەن رەسپۋبليكالىق باسىلىمداردىڭ رەداكتورلارى, وزگە دە شاكىرتتەرى مەن ارىپتەس-دوستارى كەلدى. ولار تەمىربەك قوجاكەەۆكە ءوزىنىڭ تۋعان جەرىندە مۇنداي قۇرمەت كورسەتۋ يگىلىكتى ءىس ەكەنىن اتاپ ءوتتى. ۇلاعاتتى ۇستاز جايىنداعى ەستەلىكتەرىمەن ءبولىسىپ, ريزاشىلىقتارىن ءبىلدىردى. ەسكەرتكىش پەن مۋزەي اشۋ ىسىنە مۇرىندىق بولعان تەمىربەك اعانىڭ ۇلى مادەت قوجاكەەۆ مۋزەي ءىشىن تالعامپازدىقپەن جاساقتاپ, عالىمنىڭ ەڭبەكتەرى مەن سۋرەتتەرىن, وردەن, مەدالدارى ءتارىزدى جادىگەرلەردى قويىپتى. «مۋزەيگە اكەمىزدىڭ جەكە زاتتارىنان گورى, ەستەلىك, تانىمدىق-تاعىلىمدىق دۇنيەلەرىن قويۋدى ءجون كوردىك. ءوزىنىڭ ەڭبەكتەرىن, كىتاپتارىن, ءار كەزدەردەگى العان وردەن, مەدالدارىن, كانديدات, دوكتورلىقتى قورعاعانداعى, پروفەسسور اتاعىن العانداعى قۇجاتتارىن, وزگە دە وسىنداي دۇنيەلەردى قويدىق. ءمۇسىندى ەلىمىزگە بەلگىلى ءمۇسىنشى – تىلەۋبەردى بيناشەۆ جاسادى. اكەمىزدىڭ ەسىمىن يەلەنگەن بۇل مەكتەپ-گيمنازيا ەلىمىزدەگى الدىڭعى قاتارلى مەكتەپتەردىڭ ءبىرى بولادى دەپ ويلايمىن. بۇعان ءبارىمىز دە اتسالىسۋىمىز كەرەك», – دەيدى مادەت قوجاكەەۆ. ورالحان ءداۋىت. دەرەك, سۋرەت: egemen.kz.