عارىشكەرلەرگە اق جول تىلەدى

پرەمەر-ءمينيستردىڭ ورىنباسارى بەردىبەك ساپارباەۆ بايقو­ڭىر قالاسىنا ارنايى ىسساپارمەن كەل­دى. «سويۋز تما 18-م» كەمەسى­مەن عارىشقا ساپار شەگەتىن ەكيپاج مۇشەلەرىمەن كەزدەستى. مەملەكەت باسشىسىنىڭ تاپسىرماسىمەن ەكيپاج كومانديرى سەرگەي ۆولكوۆ, بورتينجەنەرلەر قازاقستاندىق ايدىن ايىمبەتوۆ پەن دانيالىق اندرەاس موگەنسەنمەن پىكىرلەسىپ, ءساتتى ساپار تىلەدى. – بۇگىن ەلىڭ مەن ەلباسىنىڭ اتى­نان ارنايى كەلىپ, ساپارىڭا ءسات­تىلىك تىلەپ وتىرمىز. توقتار ءاۋبا­كىروۆ, تالعات مۇساباەۆ سەكىلدى الدىڭ­ع­ى تولقىن اعالارىڭنىڭ جولىن جالعاپ, ەلىڭ مەن ۇلتىڭنىڭ ابى­رويىن كوتەرگەلى وتىرسىڭ. ماقسات-مۇرا­تىڭ وڭىنان ورىندالسىن. بيىل – قازاق­ستان ءۇشىن وتە مەرەيلى جىل. قازاق حاندىعىنىڭ قۇرىلعانىنا – 550, قازاقستان حالقى اسسامبلەياسىنا – 20, ەلىمىزدىڭ ەڭ ۇلكەن قۇجاتى – اتا زاڭىمىزدىڭ قابىلدانعانىنا 20 جىل تولىپ وتىر. وسىنداي مەرەيلى شاقتا سەنىڭ كوك جۇزىنە اتتانۋىڭ ەل ابىرويىن تاعى ءبىر اسىرىپ وتىر. عارىشكەرلەرگە اق جول تىلەگەن پرەمەر-ءمينيستردىڭ ورىنباسارى قانداسىمىز ايدىن ايىمبەتوۆكە ەلىمىزدىڭ كوك بايراعى مەن قازاقستان حالقى اسسامبلەياسىنىڭ جانە ەكسپو-2017 كورمەسىنىڭ تۋىن دا تابىس ەتتى. ەندى ايدىن وسى رامىزدەردى عارىشقا وزىمەن بىرگە الىپ كەتپەك. سونىمەن قاتار, قازاق حاندىعىنىڭ قۇرىلعانىنا 550 جىل تولۋىنا وراي ارنايى مەرەكەلىك مەدال شىعارىلعان ەدى. ەلباسىنىڭ ارنايى جارلىعىمەن ەكيپاج مۇشەلەرى اتالعان مەدالمەن ماراپاتتالدى. بۇل سەرگەي ۆولكوۆتىڭ عارىشقا ءۇشىنشى ساپارى. دەگەنمەن بۇعان دەيىن ءدال مۇنداي قامقورلىقتى سەزىنبەگەنىن ايتادى. وعان ايدىن ايىمبەتوۆتىڭ اسپانعا ۇشقالى جاتقانى سەبەپ ەكەنىن دە جەتكىزدى. "جەرلەستەرىڭىزدىڭ عارىشقا ساپارىن قازاقستان حالقى مەن باسشىلىعى قالاي جىلى قابىلداپ, قۋانىپ جاتقانىن سەزىنىپ وتىرمىز",– دەدى ول. بۇدان كەيىن ءسوز العان توقتار اۋباكىروۆ پەن تالعات مۇساباەۆ ەكيپاج مۇشەلەرىنە ساتتىلىك تىلەپ, ويعا العان جوسپارلارىنىڭ ورىندالىپ, جەرگە بەلگىلەنگەن مەرزىمدە قايتىپ كەلۋلەرىنە تىلەكتەس ەكەندەرىن ايتتى. قىزىلوردا وبلىسىنىڭ اكىمى قىرىمبەك كوشەرباەۆ قاسيەتتى سىر توپىراعى ەكيپاج مۇشەلەرىن امان-ساۋ كۇتىپ الاتىنىن ءمالىم ەتتى. – سىزدەر عارىش الەمىن تاعى ءبىر مارتە باعىندىرۋعا اتتانعالى وتىرسىزدار. مۇنىڭ ۇلكەن ەرلىك تۇتاس حالىق ءبىلىپ وتىر. ءتىپتى, الگىندە ءبىلىم كۇنىنە وراي وتكەن جينالىستا ءبىر مەكتەپ وقۋشىسى جانىما كەلىپ: "ايدىن اعاعا امان-ەسەن بارىپ كەلسىن, ساپارى وڭىنان بولسىن دەپ ايتىڭىزشى", دەدى. مىنە, بۇكىل ەل ءوزىڭنىڭ تىلەۋىڭدى تىلەپ وتىر. ساتتىلىك سەرىگىڭ بولسىن, – دەدى قىرىمبەك ەلەۋ ۇلى. ءوز كەزەگىندە ايدىن ايىمبەتوۆ ەل مەن ەلباسىنىڭ سەنىمىن تولىق اقتايتىنىن, موينىنا جۇكتەلىپ وتىرعان جاۋاپكەرشىلىك ۇدەسىنەن شىعاتىنىن مالىمدەدى. قازاقستاننىڭ عارىش الەمىن زەرتتەۋدە الدا اۋقىمدى شارالار اتقاراتىنىنا سەنىمدى ەكەنىن ايتتى. ەرجان بايتىلەس, «ەگەمەن قازاقستان». بايقوڭىر.