قاندىاعاشتا ساپالى اۋىز سۋ شىعارۋ قولعا الىندى

اقتوبە. 20 قازان. اقتوبە وبلىسى قاندىاعاش اۋدانىندا جەرگىلىكتى ونىمدەردىڭ قاتارىن «DARINA AQUA» اۋىز سۋى تولىقتىردى. وسىنداي اتاۋلى اۋىز سۋدى جەكە كاسىپكەر قۋاندىق تولەگەنوۆ شىعارادى. بۇل تۋرالى egemen.kz ءتىلشىسى حابارلادى. جاقىندا اشىلعان كاسىپورىندا سەرتيفيكاتتالعان اۋىز سۋ زاماناۋي تەحنولوگيامەن وندىرىلەدى. قاندىاعاش قالاسىندا ورنالاسقان وسى تسەحتا قازىر 24 ادام ەڭبەك ەتەدى. تابيعي تازا اۋىز سۋ ۇڭعىما ارقىلى تەرەڭدىگى 200 مەتر جەردەن الىنادى. وندىرىلگەن ءونىم ارنايى سەرتيفيكاتتالعان بەلگىسى بار قۇتىلارعا قۇيىلادى. ءتۇرلى سىيىمدىلىقتاعى قۇتىلاردى كاسىپكەرلەر وزدەرى دايىندايدى. بۇل جوبا 2013 جىلى قولعا الىنىپ, ۇستىمىزدەگى جىلعى قىركۇيەك ايىنان باستاپ جەرگىلىكتى نارىققا العاشقى ونىمدەرىن شىعارا باستادى. وتاندىق ءونىم الداعى ۋاقىتتا كەدەن وداعى ەلدەرىنە دە ەكسپورتقا شىعارىلماق. جوسپار بويىنشا كومپانيا ايىنا 96 مىڭ قۇتى تابيعي اۋىز سۋ دايىندايدى. ساتىبالدى ءساۋىرباي. دەرەك, سۋرەت: egemen.kz.