تۇركى دۇنيەسىنىڭ جاۋھارلارى استاناداعى مۋزىكا فەستيۆالىندە كەڭىنەن ناسيحاتتالدى

كەشە ەلورداداعى «استانا وپەرا» تەاترىندا «استانا-ارقاۋ» ءداستۇرلى تۇركى مۋزىكاسى فەستيۆالىنىڭ سالتاناتتى جابىلۋ ءراسىمى ءوتتى. قالا كۇنىنە وراي ۇيىمداستىرىلعان مادەني شارادا تۇركى حالىقتارىنىڭ اۋەزدى مۋزىكاسى مەن ساز ونەرى كەڭىنەن ناسيحاتتالدى. ءۇش كۇنگە سوزىلعان فەستيۆالگە وتاندىق ونەرپازداردان بولەك, تۇركيا, وزبەكستان, قىرعىزستان, تۇرىكمەنستان, ازەربايجان, موڭعوليا, قىتاي ەلدەرى جانە تاتارستان, باشقۇرتستان, التاي, حاكاسيا, ساحا, تىۆا, ياكۋتيا, تايمىر, قاباردين-بالقار, داعىستان (رەسەي), قاراقالپاقستان سىندى تۇركى ۇلتتىق اۆتونوميالارىنىڭ ءداستۇرلى انشىلەرى مەن عالىمدارى قاتىستى. بۇل باستامانىڭ ماقساتى – تۇركى حالىقتارىنىڭ بايىرعى جانە قازىرگى ەتنومۋزىكاسىنداعى جاقىندىقتى ىزدەۋ, قوس زاماننىڭ سازىنان ءوزارا ۇيلەسىم مەن ۇندەستىك تابۋ. – سول سەبەپتى اتالعان شارا تۇركى حالىقتارىنىڭ كوپ جانرلى مۋ­زىكالىق مۇراسىنا ارنالدى. ناقتى ايتساق, فەستيۆال بارىسىندا تۇركى مۋزىكاسى جەكە ورىنداۋشىدان باس­تالىپ, ەپيكالىق شىعارمالار سىندى ءتۇرلى جانردا ۇسىنىلدى. سونداي-اق, ورىنداۋشىلاردىڭ شەبەرلىگى ارقا­سىندا كورەرمەندەر حالىقتىڭ اسىل قازىناسىمەن تانىسىپ, سيرەك كەزدە­سەتىن مۋزىكالىق اسپاپتاردى كورۋگە مۇمكىندىك الدى. الداعى ۋاقىتتا وسى جۇ­مىستاردىڭ قورىتىندىسى رەتىندە «استاناداعى تۇركى اۋەنى» اتتى ءبىر­نەشە ديسكىلى سD البومىن شىعارۋ جوسپارلانىپ وتىر, – دەيدى ۇيىمداستىرۋشىلار. شارا اياسىندا قاتىسۋشىلار «مىڭجىلدىقتار توعىسىنداعى استانا» اتتى ءداستۇرلى كوشپەلىلەر وركەنيەتى فەستيۆالىندە دە ونەر كورسەتتى. ول جەردە قالا تۇرعىندارى مەن قوناقتارى تۇركى مادەنيەتىنىڭ قۇندى دۇنيەسى مەن ءان ونەرىنىڭ جاۋھارلارىنا كۋا بولدى. ال جابىلۋ سالتاناتىندا حالىق قىرعىزستاننىڭ «وردو ساحنا» فولكلورلىق ءانسامبلى مەن قاباردين-بالقاردىڭ «ينەر» ونەر ۇجىمىنا ەرەكشە قول سوقتى. جەكە ورىنداۋشىلار اراسىنان قازاقستاندىق ەرلان رىسقاليدىڭ اندەرى تىڭدارماننىڭ ايىزىن قاندىرىپ, راحاتقا بولەدى. كەش سوڭىندا رامازان ستامعازيەۆ باستاعان ءبىر توپ وتاندىق ونەر جۇلدىزدارى «دەدىم-اي-اۋ» ءانىن ورىندادى. بۇل ءساتتى فەستيۆالدىڭ شارىقتاۋ شەگى دەسەك, ارتىق ايتقاندىق ەمەس. ناقىشىنا كەلتىرە شىرقالعان اننەن جينالعان حالىق ەرەكشە اسەر الدى. مۇنداي فەستيۆال العاش رەت 2009 جىلى ۇيىمداستىرىلعانىن ايتا كەتەيىك. ياعني, بيىل جەتىنشى رەت وتكى­زىلىپ وتىر. وسى ارالىقتا وعان تۇركى حالىق­تارىنان 470-تەن استام مۋزىكانت پەن سالا ماماندارى قاتىسقان. سونىمەن قاتار, جىل وتكەن سايىن اتالعان شارانىڭ اياسى كەڭەيىپ, قاتى­سۋشىلار سانى ارتىپ كەلەدى. ماسەلەن, بيىل رەسەيدىڭ سولتۇستىگىن مەكەندەيتىن تايمىر-دولعاندارى استاناعا العاش رەت كەلىپ, ونەر كورسەتتى. ودان بولەك, بيىلعى فەستيۆالدىڭ تاعى ءبىر ەرەك­شەلىگى, تۇرىكمەنستاننان وتە سيرەك كەز­دەسەتىن اسپاپتاردىڭ جەتكىزىلۋى بولدى. ەلامان قوڭىر, «ەگەمەن قازاقستان».