قىزىلوردا. 25 مامىر. قىزىلوردادا اۋىر اتلەتيكادان ەكى دۇركىن وليمپيادا, ءتورت دۇركىن الەم چەمپيونى يليا يلين اتىنداعى سپورت الاڭى اشىلدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
وسىدان بىرنەشە جىل بۇرىن بۇل سپورت الاڭىن زىلتەمىرشى ءوز قاراجاتى ەسەبىنەن سالعان ەدى. وتكەن جىلى بيزنەستىڭ الەۋمەتتىك جاۋاپكەرشىلىگى نەگىزىندە «پەترو قازاقستان قۇمكول رەسورسيز» اق-تىڭ دەمەۋشىلىگىمەن 30 ميلليون تەڭگە قارجى ءبولىنىپ, سپورت الاڭى قايتا جاڭعىرتۋدان ءوتتى.
سپورت الاڭىنىڭ اۋماعى تولىق قورشالىپ, 121 كۇل-قوقىس جاشىگى, 64 دانا ورىندىق, 158 دانا جارىق شامدارى ورناتىلدى. شاعىن فۋتبول, شاحمات, بالالار ويىن الاڭى مەن ترەناجەر جانە ستريتبول الاڭدارى پايدالانۋعا بەرىلدى.
«وبلىستا سپورتقا قىزىعۋشىلىق تانىتۋشىلاردىڭ قاتارى كۇننەن-كۇنگە ارتىپ كەلەدى. بيىل قىزىلوردا قالاسىندا بوكس ورتالىعى مەن يپپودروم, ناعي ءىلياسوۆ اۋىلىندا ستاديون مەن سپورت كەشەنى, قازالى, جاڭاقورعان اۋداندارىندا دەنە شىنىقتىرۋ-ساۋىقتىرۋ كەشەندەرى پايدالانۋعا بەرىلەتىن بولادى. سونداي-اق, قالا ورتالىعىندا يليا يلين اتىنداعى اۋىر اتلەتيكادان سپورت كەشەنى جانە 3 مىڭ ورىندىق جابىق فۋتبول مانەجى بوي كوتەرەدى. مۇنىڭ بارلىعى بۇقارالىق سپورتتى دامىتۋ ءۇشىن جاسالىپ جاتقان جاسامپاز جۇمىستار», – دەدى وبلىس اكىمى قىرىمبەك كوشەرباەۆ.
ايتا كەتەيىك, شارا وليمپيادا چەمپيونىنىڭ تۋعان كۇنىنە جەرلەستەرىنىڭ اتىنان ۇلكەن سىي بولدى. يليا يلين سپورتشىلارعا قولداۋدىڭ ارتىپ كەلە جاتقانىنا ريزاشىلىعىن ءبىلدىردى.
سالتاناتتى شارادان سوڭ شاعىن فۋتبولدان اۋەسقويلار اراسىندا جازعى ماۋسىم ليگاسىنىڭ ويىندارى وتكىزىلدى.
ەرجان بايتىلەس.
دەرەك, سۋرەت: egemen.kz.
