«ماڭگىلىك ەل» كونتسەرتى ءوتتى

كەشە ەلورداداعى ۇلتتىق مۋزەيدە استانا كۇنىنە جانە مۋزەيدىڭ 1 جىلدىعىنا وراي «ماڭگىلىك ەل» اتتى كونتسەرت ءوتتى. مەرەكەلىك شارادا قازاقستاننىڭ ەڭبەك سىڭىرگەن ءارتىسى, كۇيشى-كومپوزيتور سەكەن تۇرىسبەكوۆ جەتەكشىلىك ەتەتىن «اق جاۋىن» مەملەكەتتىك كامەرالىق وركەسترى مەن «سەرپەر» كۇيشىلەر توبى ونەر كورسەتتى. ەڭ اۋەلى مۋزەي كىرەبەرىسىندەگى اتريۋمدا دومبىرا پاتي ۇيىم­داس­تىرىلدى. بۇل شاراعا «سەرپەر» جانە «كوكبورى» دومبىراشىلار توبى قاتىستى. ەكى توپقا ءبولىنىپ كۇي تارتىس جاساعان جىگىتتەردىڭ ونەر باسەكەسى وتە قىزۋ جانە تارتىستى ءوتتى. دومبىرا ءپاتيدى مۋزەي قوناقتارى مەن قىزمەتكەرلەرى تاماشالادى. اتالعان شارادا كۇمبىرلەگەن كەربەز-كۇيدەن شاشۋ شاشقان دومبىراشىلارعا كورەرمەندەر ەرەكشە قوشەمەت كورسەتىپ, جىگەرلەندىرىپ وتىردى. مەرەكەلىك شارا بارىسىندا ۇلتتىق مۋزەيدىڭ ديرەكتورى دارحان مىڭباي ءسوز سويلەپ, ونەرلى جاستاردىڭ قادام­دارىنا ساتتىلىك تىلەپ, العىس ايتتى. سون­داي-اق, ۇلتىمىزدىڭ ءداستۇرلى ونەرىنە, سونىڭ ىشىندە دومبىراعا ارقا­شان دا مۋزەي تورىنەن ورىن تابىلاتىندىعىن جەتكىزدى. بۇدان كەيىن مۋزەيدىڭ ۇلكەن ءماجىلىس زالىندا «ماڭگىلىك ەل» دە­گەن تاقىرىپتا كونتسەرت بولدى. كون­تسەرتتە باستان-اياق «اق جاۋ­ىن» مەملەكەتتىك كامەرالىق وركەس­ترى ونەر كورسەتتى. وركەستر جەتەك­شىسى – قازاقستاننىڭ ەڭبەك ءسىڭىر­گەن ءارتىسى, كۇيشى-كومپوزيتور سە­كەن تۇ­رىس­بەكوۆ. مۇندا سەكەن تۇرىسبەكوۆتىڭ «ماڭگىلىك ەل», «اق جاۋىن», ءتاتتىم­بەتتىڭ «بەستورە», سەيدوللا بايتە­رە­كوۆ­تىڭ «كىشكەنتاي» كۇيلەرىمەن قاتار, تاعى دا باسقا ونەر تۋىندىلارى ورىندالدى. «قازاعىمنىڭ جۇرەگىنەن جا­رال­عان, دالامىزدىڭ ءۇنىسىڭ سەن, دومبىرا!», دەمەكشى, زامانا ۇنىمەن بىتە قاي­ناسقان كەربەز كۇيشى تۋىندىسى كورەر­مەنىن ءبىر ساتتە تولقىتىپ-تەبى­رەنتە الدى. كۇي الەمىن وزىنشە ءسوي­لەتىپ, نازىك پەرنەلەر ارقىلى سىر­لى ساز تۋدىرىپ, اسەم اۋەننەن سۋرەت سالعان ەرەكشە دارىن يەسىنە بۇل جو­لى دا حالقى ريزا بولىپ, اياماي قول سوعىپ جاتتى. وزدەرىڭىزگە بەلگىلى, تالانتتى ك­وم­­­­پو­زيتور س.تۇرىسبەكوۆ «ماڭگىلىك ەل» كۇيى تۋراسىندا باسپاسوزگە بەرگەن ءبىر سۇحباتىندا: – قاي مەملەكەت بولسا دا ءوزىنىڭ ۇرپاعى, وتانى ماڭگىلىك بولعانىن قالايدى. ەلباسىنىڭ جولداۋدا ايتقان «ماڭگىلىك ەل» يدەياسى دا وسى كۇيدىڭ جارىققا شىعۋىنا اسەر ەتتى. مىسالى, انشىلەر, كۇيشىلەر ەلباسىنا ارناپ ءان, كۇي شىعارىپ جاتسا, تەرىس ەمەس شىعار. بۇل كۇي ەلباسىنىڭ ويىنا, يدەياسىنا قولداۋشى بولسام, ءبىر جاعىنا شىققىڭ كەلىپ, سۇيەۋ بولسام ەكەن دەگەن ىزگى نيەتتەردەن تۋىندادى. «ماڭگىلىك ەل» يدەياسى – الداعى بولاشاقتان كۇتكەن ۇلكەن ءۇمىت. تاۋەلسىزدىگىمىز باياندى, ەلدىگىمىز ماڭگى, قوعامىمىز تىنىش بولسا ەكەن دەگەن اسىل ارمان, – دەيدى. تاعى بىردە: «ەلباسىمەن ءبىر كەزدەسكەنىمدە «سەكەن, ءوز وركەسترىڭدى قۇرساڭ قايتەدى؟» دەگەن يدەيانى بەردى. سودان مەن ەلباسىنىڭ بۇل ۇسى­نىسىن ماقۇل كوردىم. ءسويتىپ, كەيىن «اقجاۋىن» وركەسترى دۇنيەگە كەلدى دەسەم, ارتىق ايتقاندىق ەمەس. ۇجىمىممەن استاناعا كوشىپ كەلۋى­مە تاعى دا نۇرسۇلتان ءابىش ۇلى سەبەپكەر بولعان ەدى», – دەگەن بولاتىن. جيىن سوڭىندا وركەستر جەتەكشىسى س.تۇرىسبەكوۆ كورەرمەندەردى قالا كۇنىمەن جانە ۇلتتىق مۋزەيدىڭ 1 جىلدىعىمەن قۇتتىقتادى. «ماڭگىلىك ەل» تۋىندىسىنىڭ اۆتورى ەلىمىزبەن بىرگە ونەرىمىزدىڭ دە ماڭگىلىك بولۋىنا تىلەكتەستىك ءبىلدىردى. راۋشان تاۋىرحانقىزى, جۋرناليست.