قوستاناي وبلىسىندا 80 جاستاعى قاريا مۇسىلمان ءدىنىن قابىلدادى

قوستاناي. 20 قازان. قوستاناي وبلىسىنىڭ ۇزىنكول اۋدانىنداعى مەشىتتە 80 جاستاعى مارگاريتا جازيتوۆا قاريا مۇسىلمان ءدىنىن قابىلدادى. بۇل تۋرالى egemen.kz ءتىلشىسى حابارلادى. ۇزىنكول اداندىق مەشىتىنىڭ يمامى ەسەنگەلدى ءاجماحان قاجى: «مەشىت ومىرىندەگى بۇل  جاڭالىق قۇربان ايت مەرەكەسى قارساڭىندا بولعان ەدى. اجەيدىڭ ءوزى باسقا اۋداندا تۇرادى ەكەن. تۋىستارى ونى سارسەنبى كۇنى الىپ كەلدى. شاريعاتتىڭ شارتى بويىنشا, ول كىسىنىڭ قۇلاعىنا ازان شاقىرىپ, جاڭا ەسىم بەرىپ, مۇسىلمان دىنىنە وتكىزدىك. قۇربان ايت نامازىنا كەلگەن جاماعات قول جايعاندا, اجەمىز دە قول جايىپ, «اللاھۋ اكپار, اللادان بيىك ۇلىق جوق», – دەدى. قازىر يسلام قاعيداتتارى تۋرالى ورىس تىلىندە دە كىتاپتار, تۇسىندىرمە ماتەريالدار جەتكىلىكتى. اجەمىزدىڭ وقىعانى, ەستىگەنى كوپ ەكەنىن بايقادىم. يسلام دىنىنەن حابارى مول, ۇلكەن دايىندىقپەن كەلگەنى ءبىلىنىپ تۇردى. يماندىلىق تۋرالى مەشىتىمىز ۇزدىكسىز شارالار وتكىزەدى. سونىڭ وزىندە  كەيبىر ەگدە كىسىلەر ايت, جۇما نامازدارىنا كەلمەيدى, ءتىپتى مەشىتتىڭ ەسىگىنەن قارامايتىندار دا بار. اسەل اجەيدىڭ تاڭداۋى سونداي كىسىلەرگە ساباق بولسا جارار ەدى», – دەدى. اجەي جاڭا نىسپىسىنىڭ اسەل يۆانقىزى بولعانىن قالاپتى. ول  جولداسى قايىرجانمەن بىرگە ۇزاق جاسادى, ەكى ۇل, ءبىر قىز تاربيەلەدى. قازىر نەمەرە, شوبەرە سۇيگەن باقىتتى اجە. قايىرجان اتاي وسىدان ونشاقتى جىل بۇرىن دۇنيە سالعان بواتىن. اجەي ءوزىنىڭ تۋىستارى مەن بالالارىنا «ەگەر ءدام-تۇزىم تاۋسىلىپ, ولاي-بۇلاي بولىپ كەتسەم, شالىمنىڭ قاسىنا قويىڭدار» دەگەن ءوتىنىش-وسيەتىن دە ايتىپ قويىپتى. ءنازيرا جارىمبەتوۆا. دەرەك, سۋرەت: egemen.kz.