اقىن تۇرسىناي ورازبايقىزى شىمكەنتكە جەرلەندى

استانا. 25 مامىر. وتكەن اپتادا ماسكەۋدە قازاقتىڭ كورنەكتى اقىنى, سازگەر تۇرسىناي ورازبايقىزى قايتىس بولدى. سەنبى كۇنى قالامگەر تۋعان ءوڭىرى وڭتۇستىك قازاقستان وبلىسىنا جەرلەندى. بۇل تۋرالى otyrar.kz حابارلادى. قوشتاسۋ ءراسىمى شىمكەنتتەگى ءشامشى قالداياقوۆ اتىنداعى فيلارمونيا الدىندا ءوتتى. قارالى جيىنعا حالىق كوپ جينالدى. «قازاق ءتىلى» گازەتىنىڭ رەداكتورى ورىنباسار قۋاندىقوۆ: «وڭتۇستىكتە 100-دەن استام جازۋشى بار بولسا, بىزدەر, رەسەي قازاقتارى ءۇشىن تۇرسىناي سياقتىلار بىرەۋ عانا. ول كىسىنىڭ ايتقان سوزدەرىنەن ونەگە توگىلىپ تۇراتىن. مەن ءۇشىن بۇگىن وتە قايعىلى كۇن», – دەدى. تۇرسىناي ورازبايقىزى 1950 جىلى 19 اقپاندا وڭتۇستىك قازاقستان وبلىسى, سايرام اۋدانى, قايناربۇلاق اۋىلىندا تۋعان. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن, ماسكەۋدەگى جوعارعى ادەبيەت كۋرسىن بىتىرگەن. جاستايىنىن ءانشى ءارى اقىن رەتىندە كوزگە ءتۇستى. وبلىستىق دراما تەاترىندا, «وڭتۇستىك قازاقستان» گازەتىندە, قازاق راديوسىندا, جازۋشىلار وداعىندا, ساحا رەسپۋبليكاسىنىڭ قازاقستانداعى وكىلدىگىندە جۇمىس ىستەگەن. ۇزاق جىلدار ماسكەۋدەگى حالىقارالىق جازۋشىلار وداعى قاۋىمداستىعىندا قازاق ادەبيەتى بويىنشا كەڭەسشى قىزمەتىن اتقاردى. تۇڭعىش ولەڭدەر توپتاماسى «جالىن» باسپاسىنان شىققان «قانات قاقتى» اتتى جيناقتا جارىق كوردى (1975 ج.) «تاڭعى شاپاعى», «ىڭكار جۇرەك اۋەنى», «گۇلسەزىم», «تى مويا ۆەسنا» سىندى جىر جيناقتارى ورىس, ساحا جانە تۋۆا تىلدەرىنە اۋدارىلدى. حالىقارالىق «الاش» جانە ا.فادەەۆ اتىنداعى ادەبي سىيلىقتاردىڭ لاۋرەاتى. ساحا-ياكۋتيا رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى. ەلامان قوڭىر. دەرەك, سۋرەت: otyrar.kz.