اسپازدار شەبەرلىگىن شىڭداعان شارا

كەشە استانا قالاسىنىڭ 17 جىلدىعىن تويلاۋ شەڭبەرىندە «اسپازشىلار ونەرى – سۇيىكتى قالاعا» اتتى شارا ءوتتى. بۇل مەرەكەلىك شاراعا  «اسسورتي», «ۋسادبا», «پاريج», «لاگۋنا», «جاس ءامىر», «سۇڭقار», «التىن عاسىر» سىندى قالانىڭ بەدەلدى مەيرامحانالارى مەن ءدامحانالارى قاتىسقان بولاتىن. جوبانىڭ نەگىزگى ماقساتى – ەلوردا كاسىپورىندارىنداعى قوعامدىق تاماقتاندىرۋدىڭ ساپاسىن كۇشەيتۋ, قالا مەيرامحانالارىنىڭ مامانداندىرىلعان داياشىلارى شەبەرلىگىمەن ەلوردا تۇرعىندارى مەن قالا قوناقتارىن تانىستىرۋ جانە كەلۋشىلەرگە قىزمەت كورسەتۋ دەڭگەيىن جوعارىلاتۋ, ءار ەلدىڭ ۇلتتىق تاعام تۇرلەرىمەن تانىستىرۋ,  شەبەرلىكتەرىن جان-جاقتى قىرىنان كورسەتۋ. فەستيۆال شەڭبەرىندە بايقاۋعا قاتىسۋشىلار «ەڭ ۇزدىك تاعام»,  «ەڭ ۇزدىك مەيرامحانا» اتالىمدارى بويىنشا باق سىنادى. سونداي-اق, ارنايى ءادىل قازىلار سايلانىپ, تاعام قۇرىلىمى مەن ونىڭ اسەمدىگىنە, دامىنە ياعني, ارنايى تالاپتارعا ساي بولۋىن قاداعالاپ, ءادىل باعاسىن بەردى. سايىس قورىتىندىسى بويىنشا «ەڭ ۇزدىك تاعام» نوميناتسياسىن – «اسسورتي» مەيرامحاناسى جەڭىپ الدى. ال  «ەڭ ۇزدىك مەيرامحانانى» – «ۋسادبا» يەلەندى.  قوس جەڭىمپاز تاراپقا   تەلەديدار تارتۋ ەتىلىپ, بارلىق قاتى­سۋشىلارعا العىس حاتتار مەن ديپلومدار تاپسىرىلدى. راۋشان تاۋىرحانقىزى.